Prosecutor patay matapos pagbabarilin sa labas ng Davao Oriental justice hall

PATAY ang isang prosecutor matapos pagbabarilin ng hindi pa nakikilalang salarin sa labas ng Hall of Justice sa Mati City, Davao Oriental, kaninang umaga, ayon sa pulisya.
Kinilala ni Chief Insp. Andrea dela Cerna, Southern Mindanao police regional spokesperson ang biktima na si Fiscal Rolando Acido, Mati city prosecutor.

Idinagdag ni Dela Cerna na base sa inisyal na impormasyon binaril ang biktima sa labas ng Hall of Justice sa Barangay Dahican ganap na alas-8:20 ng umaga.
Papalabas sana ang 55-anyos na biktima ng kanyang kotse ng siya ay lapitan ng salarin at pagbabarilin bago tuluyang tumakas.
Itinakbo si Acido sa St. Camillus Hospital sa Mati, bagamat namatay din makalipas ang ilang oras.
Narekober ng mga pulis ang limang basyo ng baril mula sa cal. 45.
Sinusundan ang biktima ng kanyang bodyguard na nakasakay sa isang motorsiklo ng mangyari ang pag-atake.