Alden: Alam kong hindi ako singer kaya salamat po sa diamond record award!!!

WAGAS na wagas pa rin ang pagsuporta kay Alden Richards ng publiko tulad ng ipinadama nilang init sa launching ng second album niyang “Say It Again” last Sunday sa Market! Market!, Taguig City.

Umaapaw sa tao ang activity area ng mall na nagtiyagang maghintay ng ilang oras upang masaksihan ang pagkanta ng Pambansang Bae.

Bago lumabas si Alden, nagsilbing front act naman ang baguhang singer na si James Wright na kumanta ng theme song ng GMA series na Carmela na pinagbidahan noon nina Marian Rivera at Alden.

Pinatunayan niyang napakabait na tao at napaka-humble ng Pambansang Bae lalo na nang minsang sinabihan siyang tumabi sa kanila habang kumakain.

Present din sa event ang boy band na T.O.P na umani rin palakpak at sigawan mula sa audience. Nagpasampol din sila ng ilan nilang songs na kakantahin sa concert nila sa Music Museum sa Oct. 28.
Nang tawagin na on stage si Alden ay dumagundong na ang buong mall sa lakas ng sigawan at palakpakan ng mga tao. Kinanta niya ang title ng album na “Say It Again” na upbeat naman ang dating.

Then, kinanta niya ang single na “Rescue Me” na sinundan ng pagbirit niya ng cover version niya ng isa pang kanta sa album.

Towards the end, ang unang single niyang “Wish I May” ang binanatan niya. Muling iginawad sa kanya ang Diamond Record award sa nasabing album. “Alam kong hindi ako singer talaga pero nagpapasalamat ako sa unexpected award kong ito. Para sa inyo ang karangalan kong ito!” a ni Alden.

Isang praise song ang “WIM” kaya naman sa bagong album ng binata ay may tatlong praise songs pa rin na nakapaloob.

Ang isang magandang gesture na naramdaman ng press kay Alden ay ang mainit pa rin niyang pagmamahal sa showbiz writers. Nandoon pa rin ang personal na init sa pasasalamat niya sa mga sumaksi sa album launch niya.

Sayang nga lang at maikling chikahan lang ang nagawa between Alden at press pero sapat na ‘yung ilang minutong nakasama niya kami sa group pictorial.

Marami pang sorpresa si Alden sa mga susunod na araw. Meron siyang festival movie, host siya sa Asian TV Awards at ‘yung iba ay sorpresa pa.

Of course, hindi rin kinalimutan ni Alden na pasalamatan ang ka-loveteam na si Maine Mendoza.
Available na sa CD format at mabibili na sa digital stores ang “Say It Again” ni Alden under GMA Records.