Lumang video ni Dingdong biglang nag-viral

MASAYA ang buong cast ng GMA Primetime show na Alyas Robin Hood sa suportang ibinibigay ng mga manonood na naging dahilan ng napakalakas na laban nito sa ratings game.

Pinangungunahan ni Kapuso Primetime King Dingdong Dantes, nagkaroon ng isang thanksgiving mass ang buong grupo nitong nakaraang Huwebes, para sa kanilang pagkapanalo sa national ratings simula nang mag-umpisa itong umere.

Ibinahagi ni Dingdong na mula nang umere ang Alyas Robin Hood nakita na niyang blessing ang programa dahil naging daan ito upang maipakita pa niya lalo ang pagiging aktor. “Magmula naman ng umpisa, blessing talaga na magkaroon lang ng trabaho, makasama ang mga magagaling na artista at makabilang sa isang network na ang primary objective ay magbigay ng entertainment.

“At sa pagpasok namin sa aming 4th week, gusto talaga namin magbigay ng pasasalamat sa lahat ng grasya na binigay sa’min. This show is a blessing because we’re here every night to inspire, to give entertainment kaya thank you rin sa audience for giving us very good ratings,” ani Dongdong.

Nagpahayag din ng katuwaan ang esteemed director ng programa na si Dominic Zapata sa magandang resulta ng mga sakripisyo ng mga taong tumulong at nagtiwala sa kanila.

“Gusto lang namin magpasalamat na tinulungan kami ni Lord na sagutin yun mga hiniling namin. Natutuwa ako na nasuklian namin ng maayos ang sacrifices ng mga bosses namin dahil sa mataas na TV ratings ng programa,” bulalas niya.

Mapapanood pa rin ang Alyas Robin Hood mula Lunes hanggang Biyernes pagkatapos ng Encantadia sa GMA Telebabad.

Samantala, noon pa man ay attention-getter na talaga ang mister ni Marian Rivera na si Dingdong. Nag-viral ang isang video ni Dong sa social media kung saan mapapanood ang aktor bilang member ng isang cheer squad.

Habang sinusulat namin ang balitang ito ay meron nang more than 55,000 views ang nasabing video. Ayon sa ilang netizens, doon pa lang sa video ay kakikitaan na ng potential ang Kapuso Primetime King—whether in acting o dancing man—dahil kitang-kita na gusto daw nito ang kanyang ginagawa.