Live-in partner ng bodyguard ni Robredo sangkot sa droga

INALIS bilang security detail ni Vice President Leni Robredo ang isang pulis matapos madakip ang umano’y live-in partner nito sa drug operation kamakalawa sa Quezon City.
Ayon sa tagapagsalita ni Robredo na si Georgina Hernandez, pinabalik muna sa kanyang mother unit si PO3 Joey Regulacion habang nagsasagawa ng imbestigasyon ang pulisya.
Sa isinagawang Oplan Tokhang sa Brgy. Culiat kamakalawa ay nasakote ang isang Olive, isa umanong tulak na itinuturing na high-value target ng pulisya.
Sa inisyal na pagsisiyasat, nadiskubre na si Olive ay live-in partner ni Regulacion, isa sa mga pulis na nakatalaga kay Robredo sa Office of the Vice President sa New Manila.
Kinumpirma ni Hernandez na nasa listahan ng Oplan Tokhang ang ka-live in ni Regulacion.
Pero sinabi nitong boluntaryong sumuko sa mga otoridad si Olive at walang nasabat na droga at drug paraphernalia sa bahay nito.