LILIA CUNTAPAY
SUMAKABILANG-BUHAY na ang veteran character actress at tinaguriang Horror Queen na si Lilia Cuntapay sa edad na 81, kaninang umaga.
Ayon sa ulat ng ABS-CBN, dakong alas-6 ng umaga nang bawian ng buhay ang veteran actress habang nasa pangangalaga ng kanyang mga kamag-anak sa Barangay Tartarabang, Pinili, Ilocos Norte.
Mismong ang kanyang apo na si Elma Cuntapay-Daet ang nagkumpirma ng malungkot na balita.
Kung matatandaan, naging visible muli sa telebisyon si Lilia Cuntapay nang personal siyang manghingi ng tulong sa kanyang mga kaibigan at nakatrabaho sa showbiz para sa kanyang pagpapagamot.
Nagkaroon kasi ng matinding problema sa kanyang spinal cord ang matanda.
Dahil dito, hindi na siya nakalakad kaya napilitang tumigil sa pagtatrabaho at paglabas sa mga programa sa TV at pelikula.
Kung hindi kami nagkakamali, ang huling proyektong ginawa ni Aling Lilia ay ang teleseryeng Forevermore nina Enrique Gil at Liza Soberano kung saan pinag-usaan din ang loveteam nila ng isa pang veteran actor na si Nonong de Andres o mas kilala sa tawag na Banky.
Ilan pa sa mga hindi malilimutang proyekto ng Horror Queen ay ang pelikulang “Shake, Rattle & Roll”, at ang mga TV series na Okatokat at Wansapanataym.
Noong Nov. 13, 2011 natanggap ni Aling Lilia ang kauna-unahan niyang Best Actress award para sa pelikulang “Six Degrees of Separation From Lilia Cuntapay” sa Cinema One Originals Digital Film Festival na idinirek ni Antoinette Jadaone.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.