Eat Bulaga dabarkads naghahanda na sa pagbabalik ni Paolo, may sorpresa

BABALIK na ng bansa sina Alden Richards at Maine Mendoza mula sa Morocco para sa pictorial ng isang fashion magazine.

Nataon sa pag-alis nila ang pahaging ni Lola Nidora (Wally Bayola) nu’ng Lunes sa Kalyeserye tungkol sa pagbabalik ni Lola Tidora (Paolo Ballesteros).

Wala pang pormal na announcement ang pagbabalik ni Pao sa noontime show ng GMA. Hindi rin namin napanood ang Eat Bulaga nu’ng Martes kaya hindi namin na-monitor kung bumalik na siya sa Kalyeserye.

Wait na lang tayo sa magarang pagsalubong ng Dabarkads sa sutil na si Pao pati na ng pagsulpot niya sa kalyeserye kasama ang dalawang lola. Keri mang dalhin nina Wally at Jose Manalo ang series, dagdag kasiyahan pa rin ang presence doon ni Pao.

Balik na sa kanyang daily routine si Paolo pag lumutang na siya sa daily show. Need na niyang gumising nang maaga, mag-ayos at makihalubilo sa fans niyang naka-miss sa kanya.

Tinatapos ngayon ng aktor ang mga pelikula niyang “Die Beautiful” at “Bakit Lahat Ng Guwapo May Boyfriend?”