PAMUMUNUAN ng posibleng tanghalin na first overall pick na si CJ Rosario ang iba pang papasok na rookies sa pagpartisipa sa 1st Philippine Superliga (PSL) Rookie Camp ngayon sa San Juan Arena.
Ang 6-foot-1 na dating NCAA Most Valuable Player na si Rosario, na sumabak sa aksyon para sa Petron sa ginanap na PSL Invitationals, ang mangunguna sa mga aspirante sa apat na oras na rookie camp na magbibigay sa mga coaches at team owners ng ideya para sa kanilang nais na kunin manlalaro bago ang isasagawang 3rd Annual Rookie Draft sa Biyernes sa 3rd floor lobby ng SM Aura sa Taguig City.
Ang dating national team mentor na si Sammy Acaylar ng Cignal ang magsisilbing drillmaster habang ang coaches na sina Emilio Reyes ng RC Cola-Army, George Pascua ng Petron, Francis Vicente ng Generika, Ramil de Jesus ng F2 Logistics, Nene Ybanez ng Standard Insurance-Navy, Ken Moleno ng Perpetual at Villet Ponce-de Leon ng Foton ang magiging observer kasama ang kani-kanilang mga team owners.
Matapos ang mga drills ay isasabak ang mga rookies sa isang friendly match kontra sa stars ng Super Liga na sina Rachel Anne Daquis, Aby Maraño, Cha Cruz, Jovelyn Gonzaga, Ces Molina, Maika Ortiz at Rhea Dimaculangan.
Ang camp ay magsisimula ganap na ala-1 ng hapon at libreng mapanood ng mga fans.
“We want to make it easier for coaches and team owners to decide,” sabi ni PSL president Ramon “Tats” Suzara, na kararating lamang sa Tokyo, Japan matapos magsilbi bilang control committee member ng katatapos na FIVB Women’s Olympic Qualifying Tournament.
“But more than anything else, this camp will give players a chance to showcase their skills and talents and gain confidence before our annual rookie draft on Friday. This is our way to discover the future stars of the league.”
Maliban kay Rosario, inaasahan din na sasali si La Salle superstar Ara Galang sa mga incoming rookies.
Hindi rin sigurado kung sasama ito sa draft dahil pilit nitong tinatapos ang kanyang degree sa Entrepreneurship o agad na kunin bilang direct hire ng F2 Logistics na ipaparada ang nucleus ng Lady Spikers tulad nina Mika Reyes, Kim Fajardo, Kim Dy, Cyd Demecillo, Majoy Baron at Dawn Macandili.
Hindi na dadaan sa draft ang mga Lady Spikers dahil sumabak na sila sa 2015 PSL Grand Prix.
Hawak ng RC Cola-Army ang top overall pick sunod ang Generika, Perpetual, Standard Insurance-Navy, F2 Logistics, Cignal, Petron at ang Foton. Gayunman, posibleng mabago ang draft order kung magkakaroon ng kasunduan sa pagitan ng mga koponan para sa pagpapalitan ng mga manlalaro kung saan itinakda ang trading period simula alas-12 ng tanghali ngayon hanggang sa huling oras sa draft proper.
“We know that the level of competition had already increased and everybody is eager to have a very strong roster. With that, we will give teams an ample time to tweak their respective lineups prior to the draft day on Friday,” sabi pa ni Suzara.
Inaasahan din na makukuha sa first round sina dating Arellano stars Danna Henson at Angelica Legacion pati na rin ang Davao standout na si Mary Grace Berte at National University playmaker Jocelyn Soliven.
Kabilang naman sina Renelyn Raterta, Sarina Bulan, Christine Suyao, Marlyn Llagoso, Jerra Mae Pacinio, Gen Casugod, Jonafer San Pedro, Kristine Dave, Loraine Palomar, Eloisa Medina, Sheryl Laborte, Lourdes Patilano at Suzette Salas na kabilang sa posibleng makuha sa draft.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.