Angelica naalarma, nabiktima uli ng hacker

ANGELICA PANGANIBAN

NAALARMA si Angelica Panganiban nang madiskubreng may nag-post sa Instagram account ng kanyang mga kaibigan gamit ang kanyang pangalan at hinihingi ang contact number ng mga ito.

May nang-hack na naman sa kanyang IG account kaya naman agad humingi ng tulong ang Kapamilya actress sa kanyang IG followers kung paano maaayos ang kanyang account.

Ayon kay Angelica, “May hacker na nakapasok sa account ko. Nagccomment siya sa mga kaibigan ko. Nanghihingi ng mga number. At nagppost ng kung ano ano.

“Di ako maka log out sa account ko dahil baka di na ako makapasok ulit. Please let me know kung anong gagawin ko? May mga tumutulong na ayusin account ko. Salamat!” dugtong nito.

Nag-aalala si Angelica na baka malagay sa alanganin ang kanyang mga kaibigan kapag nagpatuloy ang hacker sa panloloko nito. Kaya naman agad ding naglabas ang dalaga ng babala sa kanyang followers at nagsabing hindi siya nanghihingi ng number ng kanyang mga kaibigan.

Kung matatandaan, ilang beses nang na-hack ang Instagram ni Angelica, ang isa pa nga rito ay nagtangka pang baguhin ang kanyang password.

“Talaga nga naman.. Walang magawa!!! Pati instagram ko…Hindi na kayo nakakatuwa. Ano bang nakukuha ng hacker dito? Hindi naman sya makikilala sa ginagawa nya.

“Hindi naman sya sisikat dito.. Bakit? Bakit nyo ko pinagiinitan? Anong meron sakin na wala ka? Kapag na hack mo ba accounts ko, ikaw na ko? Paki explain mo naman sakin yung purpose ng pag papanggap na ako!” ang matapang na mensahe ni Angelica sa kanyang hacker.