Thai team sasabak sa Philippine SuperLiga Invitational Cup
ITATAAS pa ng Philippine SuperLiga (PSL) ang lebel at kalidad ng kompetisyon sa pagdagdag nito sa isang club team mula sa Thailand para maglaro sa bansa at makipag-agawan sa korona ng 2016 PSL Invitational Cup na sisikad ngayong Pebrero 18 sa The Arena sa San Juan City.
Kinumpirma mismo ni PSL president Ramon “Tats” Suzara ang pagdating ng Thai squad matapos makakuha ng permiso at pagsang-ayon mula sa Thailand Volleyball Association.
Hindi pa naman pinangalanan ni Suzara, na isa ring ranking executive sa International Volleyball Federation (FIVB) at maging sa Asian Volleyball Confederation (AVC), ang Thai team bagaman sinabi nito na ang koponan ay darating sa bansa para sumabak sa semifinals kontra sa tatlong qualifiers ng bagong dagdag na kumperensiya na magsisilbing pambungad sa All-Filipino Cup at Grand Prix.
Ang Thailand ay kinukunsidera na powerhouse sa women’s volleyball sa rehiyon. Ito ay pinatotohanan ng women’s national team na nagwagi ng gintong medalya sa Southeast Asian Games sa 12 sunod na edisyon kabilang ang panghuli na 28th SEA Games sa Singapore kung saan tumapos sa ikalima ang Pilipinas.
Ilan sa matitinding koponan sa Thailand Volleyball League ang 3BB Nakhonnont, Nakhon Ratchasima, Supreme Chonburi E-Tech at Bangkok Glass na siyang kasalukuyang kampeon at pinangungunahan ng national team member na sina Pleumjit Thinkaow, Pornpun Guedpard at dating PSL reinforcement Wanida Kotruang.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.