Dollar account ni Corona pinapabusisi

Hiniling ng Office of the Ombudsman sa Sandiganbayan Second Division na ipa-subpoena ang dalawang opisyal ng Deutsche Bank AG upang tumestigo sa mga dollar account umano ni dating Supreme Court chief justice Renato Corona.
Nais ng prosekusyon na umupo sa witness stand sina Deutsche Bank AG chief country officer Enrico Cruz at Direct Securities Services head Celia Orbeta upang kilalanin ang mga dokumento kaugnay ng bank accounts ni Corona.
Ang naturang bangko ay nagpadala na ng certification sa Bureau of Internal Revenue na nauna ng nag-request na kumuha ng impormasyon sa account ni Corona at kanyang misis na si Cristina.
Batay sa ipinalabas na bank certification, ang Custody Account No. 12063170278 sa ilalim ng pangalang“Mr. Renato C. Corona” ay may face value na 0.00 mula 2002 hanggang 2008.
Noong 2009 hanggang 2010, nagkaroon ito ng balanse na $167,000 pero wala ng laman noong 2011.
Ayon sa Ombudsman nagkamal ng yaman ang mag-asawang Corona na umaabot sa P160.96 milyon pero ang kanilang lehitimong kinit lamang ay P30.37 milyon.