MRT nagkaaberya muli; 5 tren lang bumiyahe

Tumambak ang mga pasahero ng Metro Rail Transit 3 sa mga istasyon nito sa kasagsagan ng init na nararamdaman sa Metro Manila kahapon.
Mula sa kalimitang kada-10 hanggang 15 minutong paghihintay sa pagdating ng tren, may mga pasahero na inabot ng isang oras bago nakasakay.
Nabatid na limang tren lamang ang bumiyahe sa MRT3 kahapon ng hapon malayo sa kalimitang 10-15.
Kinailangang ibalik ang ilan sa mga tren sa depot ng MRT upang ayusin ang mga airconditioning unit nito.
Karaniwang nahihirapan na palamigin ng AC ang isang lugar kapag masyadong mainit ang panahon. Bukod sa mga tren ay mahabang bahagi na rin ng riles ang kailangang palitan.
Kulang na ang tren ng MRT kaya pumasok ang gobyerno sa kontrata upang bumili 48 bagong tren.
Mayroong 13 istasyon ang MRT mula North Avenue station hanggang Taft Avenue station. Kung walang aberya, ang biyahe ng tren mula sa dulo ay 30 minuto. Ang pamasahe ay mula P13 hanggang P28.