Netizen nag-post ng maling balita, supalpal kay KZ Tandingan

HINDI nakuha ni KZ Tandingan ang unang puwesto sa 6th episode ng singing competition na Singer 2018 na ginanap sa China last Friday.

Nalaglag sa 6th place si KZ pero pasok pa rin siya bilang regular contender sa Singer 2018 dahil nasa top 4 pa rin siya nang pagsamahin na ang score niya sa 5th at 6th episode.

Nakuha ng sikat na Chinese singer na si Hua Chenyu ang 1st place, 2nd place naman si Jessie J (UK), 3rd si Angela Chang (Taiwane), 4th place si Wang Feng (Chinese rock star) at 5th si Li Jian (Chinese-Mandarin-pop/folk singer).

Hindi naging madali ang laban ni KZ sa 6th episode ng Singer 2018 dahil Mandarin classic songs ang kinanta niya na ipinagtaka rin ng lahat kung bakit ito ang napili ng dalaga dahil malaking sapalaran ito sa parte niya bilang dayuhan.

Ang paliwanag ni KZ, “What’s good about taking risk especially at this point of competition, shows that you’re serious with your craft. I want to show my respect to the Chinese audience and to the Chinese culture and Chinese music.”

Naibahagi ng Philippine pride na nagustuhan niya kaagad ang melody ng kantang may English title na “What Do You Want From Me” na kinanta ni Joker Xue, sikat na Chinese singer/record producer at actor.

“I actually heard this song by accident, I instantly fell in love with the melody of the song. When I found out the song really meant I fell in love more with the song,” pahayag ng dalaga.

Tatlong sikat na awitin ang ginawang medley ni KZ, ang “What Do You Want From Me”, “All The Things You Never Knew” (Leehom Wang) at “Still Hurting” (Power Station) na inaral talaga niya ang tamang pagkanta at pati tamang pagbigkas.

Aniya, “I had about less than two weeks to learn the song, I always asked them, how do you do it, how do you position your tongue and your teeth, so you can pronounce that word (lovers)? If I don’t get it perfect, I hope I can go close to the almost perfect pronounciation.”

“If I’ll stay or go home, I think the Philippines will be very proud because I did everything that I could,” sambit ng dalaga.

Pansin kaagad ni Jessie J na ninenerbyos si KZ at sinabihan naman siya nito ng “Goodluck” pati na ng iba pa niyang katunggali.

Punumpuno ng emosyon ang pagkaka-awit ni KZ kaya naman ang Chinese audience na nanonood sa kanya ay damang-dama ang kanta, at may mga tumutulo pa nga ang luha. ‘Yung iba ay nakapikit pa at sinasabayan ang kanyang pagkanta.

Ang ganda ng simula ng pagkanta ng Pinay singer kaya napangiti si Jessie J samantalang nakatitig naman si Hua Chenyu at ibang kalaban niya dahil alam nilang mahirap ang piyesa ng tatlong kanta pero nabigyan ng justice ni KZ.

At nang matapos na ang performance ni KZ, “I like the way she ended it, didn’t exaggerate it,” sabi ni Hua Chenyu.

May nagsabing, “Not easy for her, so hard (pagkanta ng Mandarin song).”
Hirit naman ni Wang Feng, “Good, I think, she picks the right songs too.”
“A lot of facial expression and very touching, too,” sabi naman ng isa sa staff ng Hunan TV.

Bago umalis ng entablado si KZ ay ipinakilala niya ang pangalan niya sa salitang Mandarin at isinisigaw naman ang pangalan niya ng lahat, sabay heart sign na labis na ikinatuwa ng dalaga.

Curious kami kung ano ang susunod na kakantahin ng ating bet sa Singer 2018.

Samantala, sinagot ni KZ sa pamamagitan ng Twitter ang isang netizen na nagtanong kung bakit daw ang “Anak” ni Freddie Aguilar ang kinanta niya sa kumpetisyon kaya raw siguro hindi naka-relate ang audience.

“The problem is people react to hearsay. I didnt sing Anak, and if you did a little bit of research you’d know. & even if I actually did sing Anak, they’d appreciate it because the Mandarin and Cantonese version of Anak is famous in China,” tweet ni KZ.