Donita Nose nagpaalam sa Wowowin para makaraket sa ibang bansa

ISANG magandang ehemplo para sa maraming personalidad ang masarap na pagtanaw ng komedyanteng si Donita Nose sa tao at programang nagbigay sa kanya ng magandang espasyo para sa kanyang mga pangarap.

Matagal nang stand-up comedian si Donita Nose, pero mas napansin siya ng publiko nang kunin siyang co-host ni Willie Revillame sa Wowowin, panalung-panalo ang kanilang batuhan ng mga jokes sa game show.

Hanggang sa dumating ang pagkakataong dumami na nang dumami ang kanyang mga raket dito at sa iba-ibang bansa, nagpaalam siya kay Willie na sasamantalahin niya na ang pagkakataon, dahil baka hindi na ‘yun maulit pa uli.

Pinayagan naman siya ni Willie, binasbasan nito ang pagraket abroad, kaya ganu’n na lang ang pasasalamat ng komedyante sa kanyang kuya.

Ngayon ay napapanood na si Donita Nose sa maraming shows ng GMA 7, nagbukas ang pintuan sa kanya ng network dahil kay Willie, abut-abot ang pagpo-post niya ng pasasalamat sa kanyang Kuya Wil na hindi nagdamot sa kanya ng tiwala at suporta.

Marunong tumanaw ng utang na loob si Donita Nose, hindi siya nakalilimot, kaya siguradong mas marami pang biyaya ang darating sa kanyang buhay at career.