Basketball goal bumagsak; stude patay, 1 pa sugatan

Nasawi ang isang estudyante at isa pa ang nasugatan nang mabagsakan ng basketball goal ng kanilang paaralan sa Zamboanga City nitong Martes, iniulat ng pulisya Miyerkules. Nasawi ang 12-anyos na si Grey Shen Kurt Balanto, isang Grade 8 student sa Don Pablo Lorenzo Memorial High School, ayon sa ulat ng Zamboanga Peninsula regional police. Isinugod naman si Jay Mark Gutierrez, 13, isa ring Grade 8 student, sa Cuidad Medical Center dahil sa mga tinamong pinsala sa mukha. Naganap ang insidente dakong alas-12:25 ng tanghali sa gymnasium ng Don Pablo Lorenzo Memorial High School. Sadyang nagtungo sa gym sina Balanto, Gutierrez, at ang 14-anyos na si Remitch Remigio, isa ring Grade 8 student, noong kanilang lunch break para makakuha ng libreng Wi-Fi connection, ayon sa ulat. Lumabas sa imbestigasyon na naupo si Remigio sa ilalim ng basketball goal at napansin itong unti-unting bumabagsak. Sinabiyan niya ang mga kasamahan na lumayo sa goal, pero hindi umano narinig ni Balanto ang babala dahil gumagamit ng headset ang huli, ayon sa ulat.