JoWaPao: Marami pa kaming kakaining bigas bago maabot ang level ng TVJ!

November 22,2017
share this

JoWaPao: Marami pa kaming kakaining bigas bago maabot ang level ng TVJ!

November 22,2017
share this

JOSE MANALO, WALLY BAYOLA AT PAOLO BALLESTEROS

HINDI lang sa longest running noontime variety program na Eat Bulaga masasaksihan ang wit at comedic chemistry nina Jose Manalo, Wally Bayola at Paolo Ballesteros, kundi pati na rin sa kanilang morning talk show at bagong pelikula.

Nagpapasabog ng hugot at good vibes ang tatlong TV host-comedian na mas kilala ng sambayanang Pinoy as the JoWaPao – bilang sina Lola Tidora, Nidora at Tinidora sa kanilang late morning program na The Lolas’ Beautiful Show.

Ang 30-minutong programa bago ang Eat Bulaga ay nagbabahagi ng mga kuwento ng mga paborito nating artista at mga aral na kanilang natutunan sa buhay at pag-ibig. Mapapanood din ang pagbibigay ng mga lolas ng words of wisdom sa manonood.

“Ang programa ay extension na ng Kalyeserye. Pareho pa rin ang mga karakter namin pero mas madami na kaming nakakausap at nakikilalang tao. Mas nakakapaghatid kami ng tuwa at ligaya sa manonood dahil na din sa good vibes na hatid ng show,” saad ni Wally.

Ayon sa tatlo, isang sorpresa sa kanila ang mabiyayaan ng bagong proyekto tulad ng The Lolas’ Beautiful Show. Nabigyan lamang daw sila ng dalawang linggo upang mapaghandaan ang kanilang pilot episode na umere noong 25 ng Setyembre. Ayon kay Paolo, hindi nila talaga in-expect na magkakaroon sila ng sarili nilang talk show.

“Masaya kami sa oportunidad na ito dahil alam namin na hindi araw-araw ay may dumarating na ganitong blessing. Andoon din yung pakiramdam na mas may malaki kaming responsibilidad sa manonood. Pinag-aaralan namin ang lahat. Pinag-uusapan ang bawat episode ng programa dahil gusto namin na makapagbigay ng dekalidad na show sa kanila,” saad nito.

Para naman kay Jose, nagpapasalamat siya dahil kahit dalawang taon na ang lumipas simula nang maipakilala sa telebisyon ang mga lolas ng Kalyeserye, patuloy pa rin itong sinusundan at tinatangkilik ng manonood. Nagpapasalamat din ito sa suporta na ibinibigay ng kanilang Eat Bulaga family.

Sa ngayon, nananalangin ang tatlo na ang pagmamahal at suportang kanilang natatamasa ngayon ay maibigay din sa kanilang bagong pelikula, ang “Trip Ubusan: The Lolas vs Zombies” mula sa APT Entertainment at M-ZET TV Production.

Sa nasabing pelikula ay patuloy ang pagbibigay buhay ng JoWaPao sa kanilang mga karakter sa Kalyeserye ngunit sa puntong ito ay hindi upang gabayan sina Alden Richards at Maine Mendoza, kundi ipakita ang kanilang mga personal adventures. Kasama nila rito sina Miggy Tolentino, Kenneth Medrano, Caprice Cayetano, Shaira Mae dela Cruz, Taki Saito, Arthur Solinap, Angelika dela Cruz at Ryzza Mae Dizon.

“Ibang-iba ang proyekto na ito sa Lolas’ Beautiful Show dahil na rin sa action-adventure na tema ng movie,” saad ni Wally. Dagdag ni Jose, ipapakita nila na kahit na may edad ang mga lolo at lola natin ay marami pa rin silang magagawa sa buhay.

q q q

Samantala, kahit na busy ang tatlo sa kaliwa’t kanang showbiz commitments, hindi nila alintana ang pagod at stress.

“Nagtatrabaho kami araw-araw pero di mo kami mariringgan ng kahit na anong reklamo kasi gusto namin ang ginagawa namin. Mahal namin ang trabaho at ang mga kasama namin dito. Nagpapasalamat kami sa lahat ng pagmamahal at suporta,” saad ni Paolo.

Para naman sa mga patuloy na nagkukumpara o nagsasabi na sila na ang pwedeng sumunod sa mga yapak ng haligi ng Eat Bulaga na sina Sen. Tito Sotto, Vic Sotto at Joey de Leon, ang kanilang magkakasabay na tugon ay, “Marami pa kaming kakaining bigas.”

Dagdag pa ni Jose na lahat ng jokes, hosting style at kung paano makipag-interact sa audience ay natutunan nila sa TVJ, pero hindi nila kayang pantayan ang mga nagawa at putuloy na nagagawa ng mga main men ng Eat Bulaga sa showbiz.

“Masaya kami pag naikukumpara sa TVJ pero napakalayo pa. Wala pa kami sa kalingkingan nila.

Walang makakalampas sa nagawa at patuloy na ginagawa ng TVJ. Ang tanging magagawa lang namin ay gawin silang inspirasyon at laging isapuso kung bakit kami nasa harap ng kamera – ‘yun ay para magbigay saya at ligaya sa lahat,” ani Jose.

Wag palampasin ang The Lolas’ Beautiful Show tuwing 11:30 a.m. sa GMA at ang “Trip Ubusan: The Lolas vs Zombies” na showing na ngayon sa mga sinehan. nationwide.

Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.

TODAY'S ISSUE OF BANDERA
What's trending