Phoenix Fuel Masters pinataob ang Barangay Ginebra Gin Kings

Mga Laro Ngayon
(Araneta Coliseum)
4:30 p.m. Alaska vs Rain or Shine
6:45 p.m. Meralco vsSan Miguel Beer
Team Standings: Meralco (4-0); Alaska (3-0); Star (3-0); Rain or Shine (3-1); TNT (2-1); Phoenix (2-2); Mahindra (1-3); GlobalPort (0-2); Barangay Ginebra (0-1); NLEX (0-4); Blackwater (0-4); San Miguel Beer (0-0)

NAGPAKITA ng katatagan ang Phoenix Petroleum Fuel Masters sa huling yugto ng laro para pataubin ang Barangay Ginebra Gin Kings, 94-91, sa kanilang 2017 PBA Commissioner’s Cup out-of-town game Sabado sa University of Southeastern Philippines Gym sa Davao City.

Gumawa si Matthew Wright ng 27 puntos, 6 rebounds at 3 assists para pangunahan ang Fuel Masters na umangat sa 2-2 record.

Nagtala naman si Japeth Aguilar ng 15 puntos, 7 rebounds at 5 blocks para sa Gin Kings na nakatikim agad ng pagkatalo sa unang laro.

Samantala, tatangkain ng Meralco Bolts na mapalawig ang kanilang winning streak sa limang panalo sa pagsagupa sa 3-time PBA Philippine Cup champion San Miguel Beermen sa kanilang laro ngayon sa Smart Araneta Coliseum sa Cubao, Quezon City.

Mauunang sasalang ang Alaska Aces na hangad mahablot ang ikaapat na diretsong panalo sa pagsagupa sa defending champion Rain or Shine Elasto Painters sa opening game dakong alas-4:30 ng hapon bago sundan ng salpukan ng Bolts at Beermen sa ganap na alas-6:45 ng gabi na main game.

Sasandalan ng Meralco ang import nitong si Alex Stepheson na makakatuwang nina Chris Newsome, Baser Amer, Jared Dillinger at Reynel Hugnatan.

Ipaparada naman ng San Miguel Beer ang import nitong si Charles Rhodes na suportado nina June Mar Fajardo, Arwind Santos, Alex Cabagnot at Marcio Lassiter.