Gilas Pilipinas Final 12 kasado na; Abueva, Tenorio laglag

PASOK sa 12-man pool si naturalized center Andray Blatche, kasama sina June Mar Fajardo, Jayson Castro, Gabe Norwood, Terrence Romeo, Ranidel de Ocampo, Japeth Aguilar, Marc Pingris, Troy Rosario, Ryan Reyes, Ray Parks and Jeff Chan na siyang maglalaro para sa Gilas Pilipinas. Pinangalanan ang bubuo ng grupo mahigit isang linggo na lang ang nalalabi bago ang Fiba Olympic qualifying tournament. Nalaglag naman mula sa listahan sina Alaska forward Calvin Abueva at Ginebra point guard LA Tenorio. Bagaman bigong makalusot ang dalawa ay mananatili pa rin naman silang kasama ng pambansang koponan bilang reserves sa July 5-10 event na gaganapin sa MOA Arena sa Pasay City kung saan nakatakdang makaharap ng Gilas sa group A ang powerhouse France na pangungunahan ni NBA at San Antonio Spurs star Tony Parker sa July 5 bago sagupain ang New Zealand sa sumunod na araw. Kinakailangan ng Gilas na makuha ang una o ikalawang pwesto sa preliminary round upang makaabante sa knockout semifinals kung saan maaari nilang makalaban ang bansang Turkey, Canada o Senegal na nasa group B.