Jinggoy nais makaboto sa Lunes

Naghain ng magkahiwalay na mosyon si Sen. Jinggoy Estrada upang siya ay makalabas ng kanyang kulungan para maipasuri ang kanyang balikat, makaboto at makapunta sa miting de avance ng kanyang anak na tumatakbong vice mayor ng San Juan.
Ayon kay Estrada sinuri siya ni Dr. Raymond Nunez sa kanyang kulungan sa Philippine National Police custodial center at inirekomenda nito na ipa-x-ray at Magnetic resonance imaging ang kanyang sumasakit na kanang balikat.
Sinabi ni Estrada na pinayagan siya ng korte noong nakaraang taon na ipa-therapy ang kanyang frozen shoulder sa Cardinal Santos Medical Center.
“Considering accused’s health issues there is need for him to undergo immediate X-ray and MRI of his right shoulder as recommended,” saad ng mosyon.
Hiniling din ni Estrada na siya ay payagan ng Sandiganbayan Fifth Division na makaboto sa Lunes.
“It is every citizen’s duty and constitutional right to vote. Not only, it is right and duty but failure to exercise said right can lead to disenfranchisement of his right of suffrage,” saad ng mosyon.
Kung papayagan, nais ni Estrada na bumoto sa pagitan ng 11 ng umaga at 1 ng hapon sa kanyang presinto sa Xavier School sa San Juan.
Naghain ng hiwalay na mosyon si Estrada upang makapunta sa miting de avance ng kanyang anak na si Janella Ejercito na tumatakbo sa pagkabise mayor. Gagawin ito sa pagitan ng 6 hanggang 10 ng gabi sa Pinaglabanan Shrine.
“He makes this appeal to the Court with the hope that the court and the prosecution will understand the need for a father to do all the pleas and motion to the court to be part of his daughter’s desire to be a public servant of the City of San Juan.”
Si Estrada ay nakakulong kaugnay ng kinakaharap na kasong plunder matapos umanong tumanggap ng daang milyong kickback mula sa non government organization ni Janet Lim Napoles kung saan napunta ang kanyang pork barrel fund.