Gilligan’s vs Foton Tornadoes sa PSL Beach Volley finals

IBINUHOS nina Danika Genrauli at Norie Jane Diaz ng Gilligan’s ang lahat ng nalalaman sa deciding third set para kalusin sina April Rose Hingpit at Wensh Tiu ng Cignal HD Spikers B, 25-23, 18-21, 15-3, sa semifinals ng PLDT Home Ultera-Philippine SuperLiga (PSL) Beach Volleyball Challenge Cup na handog ng Smart Live More noong Sabado ng gabi sa Sands By The Bay sa MOA sa Pasay City.

Ang panalo ay nagtulak sa koponan para harapin sina Fiona Ceballos at Patty Orendain ng Foton Tornadoes na pinagpahinga ang sister team na Foton Hurricane na binuo nina Bea Tan at Pau Soriano, 21-18, 21-16, sa isa pang laro.

Bago ito ay tinalo muna ng Gilligan’s ang Amy’s na kinatawan nina Samantha Dawson at Marleen Cortel, 21-14, 21-11, habang nagwagi ang Tornadoes sa Philips Gold nina Rossan Fajardo at Aileen Abuel, 21-9, 21-2, sa quarterfinals.

Sa Agosto 8 magwawakas ang torneong inorganisa ng SportsCore katuwang ang Accel, Sands By The Bay, Senoh at Maynilad at tampok na bakbakan ang one-game finals sa kalalakihan at kababihan.

Ang SM By The Bay A at Champion Infinity B ang magtutuos sa kalalakihan.

“Strategy at proper communication ang nagbangon sa amin matapos matalo sa second set,” wika ni Gendrauli.

Bukod sa mahusay na pag-atake, umulan din ng service aces para sa Sisig Queens para makuha ang madaling panalo sa huling set.

Lalabas na dehado sina Gendrauli at Diaz dahil sina Ceballos at Orendain ay hindi pa natatalo sa liga. Beterana rin ang dalawa sa ibang beach volleyball events at nagkakampeon pa.

“Medyo alam na rin namin ang galaw nila pero ngayon ay mag-e-ensayo muna kami at paghahandaan ang finals,” ani pa ni Gendrauli.