Daniel sa ‘smoking photo’: Hindi po yosi yun, hindi rin po droga!

DANIEL PADILLA

IPINAGTANGGOL ni Daniel Padilla ang sarili sa kumalat na “smoking photo” sa social media kung saan kasama niya ang rumored girlfriend na si Kathryn Bernardo.

Makikita sa nasabing litrato si Daniel habang tila binubugahan ng usok si Kathryn na pasakay sa isang van. Nabatid na isang e-cigarette lang ang gamit ni DJ at mariin niyang dinenay na totoong sigarilyo iyon.

Paglilinaw ni Daniel sa isang panayam, “Hindi yosi ‘yun. Hindi rin ‘yun droga. Vapor po ‘yun. Hindi naman ako nag-yosi, talagang vape lang. Hindi ko naman lahat sinasabi mag-vape na pero siguro tayo namang tao, may mga sariling buhay din naman tayo. May mga sarili tayong gusto.”

Sey ni Daniel, naniniwala siyang wala siyang ginagawang masama, dalawa lang daw ang matatawag niyang “bisyo”, “Magpuyat at basketball, ‘yun lang.”

Aminado si Daniel na mahirap talagang maging isang artista, kahit maliit na bagay lang ay pinalalaki pa, “Mahirap kasi parang ‘yun nga, nakita akong nagve-vape, mali kaagad. Mahirap. Pero kung ayaw niyo na sa akin, ayaw niyo na.”

Kung anu-anong masasamang komento ang nabasa namin tungkol sa kumalat na video ni Daniel, may mga nagsabing kahit daw e-cigarette lang ‘yun ay hindi na raw dapat pang ibinabandera ni DJ in public dahil maraming kabataan ang umiidolo sa kanya.

Pero meron din namang nagtanggol sa bida ng seryeng Pangako Sa ‘Yo, tao lang daw si Daniel at hindi santo. At wala rin siyang inaakapan o inaagrabyadong tao kaya hindi tamang husgahan siya nang dahil lang sa pagyoyosi.

Samantala, patuloy pa ring nangunguna sa ratings game ang Pangako Sa ‘Yo nina Daniel at Kathryn, kasama pa rin ang love triangle nina Ian Veneracion, Jodi Sta. Maria at Angelica Panganiban.

Gabi-gabi pa ring nagte-trending ang #PSY sa social media dahil na rin sa matitinding tagpo sa serye, lalo na kapag magkaeskena na sina Daniel at Kathryn bilang sina Angelo at Yna.

At siyempre, nananatiling malakas sa manonood ang tatlong co-stars nina DJ at Kath na sina Ian bilang si Eduardo Buenvista, Jodi as Amor Powers at Angelica na gumaganap bilang Madam Claudia. Atat na atat na nga ang viewers sa mga pasabog nina Jodi at Angelica.

Kuwento nga nina Daniel at Kathryn, napakarami pang magaganap sa Pangako Sa ‘Yo na hindi dapat palagpasin ng madlang pipol. Dapat daw huwag silang aabsent gabi-gabi dahil mas matitindi ang mga tagpong mapapanood ng viewers.