Hiling ng EB Dabarkads sa GMA 7: Bigyan ng sariling show sina Yaya Dub at Alden

WALA na talagang makapipigil sa pagsikat ni Yaya Dub, ang bagong miyembro ng Dabarkads na nakakasama nina Jose Manalo, Wally Bayola at Paolo Ballesteros sa “Problem Solving” segment ng Eat Bulaga.

Patok na patok sa mga manonood ang pinaggagagawa ni Yaya Dub sa nasabing noontime show ng GMA 7, lalo na kapag nagkukulitan na sila ni Lola Nidora, ang karakter naman ni Wally sa nasabing segment na bahagi pa rin ng “Juan for All, All for Juan.”

Pero ang talagang nagte-trending tuwing tanghali kapag umeere na ang Eat Bulaga ay ang loveteam nina Yaya Dub at Kapuso matinee idol Alden Richards, na naging regular co-host na rin sa EB.

Marami kasi ang kinikilig at natutuwa sa tambalan ng dalawa, lalo na kapag tinutukso na sila ng mga dabarkads.

In fairness, talagang pinag-uusapan sa social media ang mga kilig moments ng dalawa kahit na nga hindi sila nagkakasama nang personal sa show.

Nasa studio lang kasi si Alden habang umiikot din sa mga barangay si Yaya Dub (Maine Mendoza sa tunay na buhay na nakilala sa kanyang series of dumbsmash).

Sa katunayan, naging viral pa ang isang video nila na in-upload sa official Facebook fanpage ng Eat Bulaga – balitang umabot na sa 2.3 million views ang nasabing video.

At mula nang pumatok sa viewers ang loveteam ng dalawa, araw-araw na silang tinutukso sa noontime show, biro nga ng mga kasamahan nila, lagi raw “inspired” ngayon ang binata dahil kay Yaya Dub.

Dahil nga rito, maraming manonood ang nagre-request sa GMA na bigyan na ng sariling show sina Yaya Dub at Alden hangga’t mainit pa sila sa publiko.

Matagal-tagal na rin kasing walang serye si Alden, kaya bakit daw hindi samantalahin ng Kapuso network ang kasikatan ngayon ng dalawang dabarkads.

Sa mga hindi pa nakakakilala kay Yaya Dub o kay Maine Mendoza, sumikat siya sa internet dahil sa panggagaya niya kay Kris Aquino.

In fact, ang compilation niya ng Kris Aquino Dubsmash ay meron nang 3 million views at 44, 437 shares.