Daniel naka-score na naman, hinalikan si Kathryn sa ‘Most Wanted’ concert

TULAD ng inaasahan namin, tagumpay na naman ang ikatlong major concert ni Daniel Padilla, ang “Most Wanted” na ginanap noong Sabado sa MOA Arena.

Halos magiba ang venue sa walang humpay na hiyawan, palakpakan at padyakan ng libu-libong fans ni Daniel pati na rin ni Kathryn Bernardo mula simula hanggang ending ng show. Talagang bawat kanta ni DJ ay in-enjoy ng audience.

Pero siyempre, ang talagang hinintay ng KathNiel supporters ay ang pagsasama ng Teen King and Queen sa stage ng Arena. Hindi binigo ng magka-loveteam ang lahat ng nanood ng “Most Wanted” dahil sa huling bahagi ng concert ay nag-duet nga ang dalawa.

Sinundo ni Daniel si Kathryn mula sa kinauupuan nito sa harap ng stage at dinala sa stage, kinanta nila ang theme song ng kanilang number one Primetime Bida series na Pangako Sa ‘Yo.

Dito na mas naging wild ang fans, as in talagang hiyawan at halos magwala sa tuwa ang mga ito. At siyempre, abot-langit ang kaligayahan ni DJ nang mahalikan niya uli si Kathryn sa harap ng madlang pipol na ikinakilig nang bonggang-bongga ng mga tao sa venue.

Ang iba pang naging guest ni Daniel sa “Most Wanted” ay sina KZ Tandingan, Edgar Allan Guzman, Nyoy Volante, Morisette Amon, ang boy group na Harana, Kyla at Gary Valenciano.