Robin: Oo, galit na galit ako sa mga politiko! sobra na ‘to!

MALINAW sa lahat na hindi sinulot ng action superstar na si Robin Padilla kay Ryan Agoncillo ang Talentadong Pinoy bilang host. Nu’ng inalok daw sa kanya ang reality talent show,  si Ryan ang una niyang tinanong.

“Ay, naku, hindi! Hindi ko ugali ‘yun. Wow! Ang pangit na ugali ‘yun. Katunayan, hindi na nga si Ryan ang issue, kay Willie (Revillame) na. Nu’ng sinabi nila na in-offer na nila kay Ka Willie, doon ako umatras.

Ah, medyo mahirap ‘yan, huh!” bulalas ni Robin nu’ng makausap namin siya sa presscon ng Talentadong Pinoy. Tumanggi  agad siya upon mentioning the name of Willie, “Nanggaling na kasi kami sa Wowowee, ‘di ba? Kaya hinintay kong makausap si Jay (Montelibano).

Sabi ko kausapin ko muna siya, kapag sinabi niya sa akin na okey, okey ako. Kaya nag-meeting kami ni Jay. Sabi ni Jay, ‘Hindi, sabi ni Kuya (Willie), okey. Good luck!”

Tiniyak ng action superstar na hindi sila mapapahiya sa viewers sa bagong “sangkap” na gagawin nila sa Talentadong Pinoy. Hindi rin daw siya dapat ikumpara sa dating host nitong si Ryan Agoncillo.

“Ah, hindi. Hindi nila pwedeng i-compare kasi legend na ‘yun, e. ‘Yung ginawa ni Ryan legend na ‘yon. Eto totally, iba ito. Marami pa sila, yaman nating mga Pilipino ‘yun, e.”

Tagapagtawid sa mga contestant at hindi host ang role niya sa Talentadong Pinoy. Ang misis niyang si Mariel Rodriguez at si Tuesday Vargas daw ang hosts ng show, “Sa palagay ko hindi mahirap sa akin ‘yung magkaroon ng kontak sa contestant.

Siguro kung politician ‘yan, dagukan ko pa ‘yan,’ sambit ni Robin. Natanong tuloy namin si Robin kung galit siya sa mga politiko, “Ah, oo ang laki! Ang laki! Sobra na,” sambulat niya.

Ang mga nakausap niyang contestants sa bagong Talentadong Pinoy ang instrument para ma-inspire at lumakas si Robin, “Totoo ‘yun.

Nag-almusal kami, nu’ng kausap ko sila, nakakakamangha na nai-inspire ka ulit dahil naririnig mo ulit  ‘yung ginagawa ko ‘to dahil ‘yung ka-patid ko gusto kong pag-aralin. ‘Yung wow! Hanep!”

Very thankful si Robin sa buhay niya ngayon, sa personal at propesyunal na aspeto, “Wala na po akong mahihiling. Wala na po akong ginagawa kundi magpasalamat sa Panginoong Diyos.

Hindi lang sa akin, pati na sa buong pamilya ko. Ang pagpapala talaga namang, minsan iniisip mo na lang kung ano pa ang dapat mo’ng gawin na kapalit na biyaya. Sobra-sobra,” lahad pa ni Robin.

( bandera.ph file photo )