KC napikon sa pagkakadawit sa Anne-John Lloyd scandal

NAPIKON si KC Concepcion sa ilang mensahe ng mga followers niya sa Twitter at iba pang social networking sites, may kinalaman ito sa pagkakadamay niya sa iskandalong kinasasangkutan ni Anne Curtis.

Nag-ugat ang lahat nang mag-post si KC tungkol sa juice cleanse diet na isa sa mga naging dahilan kung bakit nalasing nang bonggang-bongga si Anne sa isang bar kamakailan na nauwi nga sa pananampal niya kay John Lloyd Cruz at sa mga kasamahan nito.

Kung matatandaan, sa official statement ni Anne may nasabi siyang “super popular juice cleanse”, ito raw ang rason kung bakit nalasing siya agad nang uminom sa party ng kanyang kaibigan.

Tatlong araw siyang walang kain at puro juice lang saka uminom ng alak. At ilang oras lang pagkatapos mag-post ng official statement si Anne sa kanyang Twitter account (Dec. 1), nag-post naman si KC ng isang picture ng juice drink, bahagi raw iyon ng kanyang juice cleanse diet.

Sabi ni KC sa kanya post, “Para sa akin, nakaka GOOD MOOD ang juice clease! Be happy, my sweet & beautiful followers.”
Hindi naging maganda ang dating nito sa mga netizens, feeling nila, si Anne ang pinatatamaan ng TV host-actress.

Bukod dito, naglabasan din ang mga article sa ilang website na may titulong “Insta Scoop: KC Concepcion Contradicts Anne Curtis’ Claim on Cleansing Diet”.

Ilang supporters naman ni KC ang nagtanggol sa kanya, anila, walang ibig sabihin si KC sa kanyang Instagram post, sa katunayan, hindi pa pumuputok ang isyu kay Anne, madalas nang mag-post si KC ng tungkol sa nasabing juice drink.

At kahapon nga ng madaling-araw, hindi na siguro keri ni KC ang manahimik lang dahil lumalaki na ang balita, dalawang tweet ang pinost ni KC sa kanyang Twitter, aniya, “Some people are really good at stressing themselves out.

Ang mga bagay na walang connect, kinoconnect. Ending, sila ang #haggard. “Note to #assuming & overprotective individuals… Next time, please get the facts straight before you disturb someone else’s peace.

Thank u,” sabi pa ng nairitang si KC Concepcion.

( Photo credit to Google )