Laro Bukas
(Mall of Asia Arena)
2:30 p.m. Letran vs San Beda (Game 3)
SA pagkakataong ito ang mga bench players ng Letran Knights ang kuminang para maitabla ang 89th NCAA men’s basketball Finals sa 79-74 panalo sa San Beda Red Lions kahapon sa Mall of Asia Arena sa Pasay City.
Si Mark Cruz ang nanguna uli sa kanyang 16 puntos para pamunuan ang apat na Knights na may doble-pigura pero hindi nagpahuli ang mga reserves na sina John Tambeling, Jamil Gabawan at McJour Luib na nagtulung-tulong sa 19 puntos.
“The credit should go to the players for accepting the challenge. Problema namin sa Game One is that we were tentative, ang lalim ng iniisip nila. Matapos ang practice namin noong Tuesday, I told them to have fun and play without pressure,” wika ni Knights coach Caloy Garcia.
Ang do-or-die Game Three ay gagawin bukas at maghahanda ang koponan sa ilang adjustments para maipaghiganti ang kabiguang tinamo sa Red Lions noong nakaraang taon.
May 10 puntos sa huling yugto si Cruz at ang kanyang dalawang free throws sa huling 10.9 segundo ng laro ang nagtiyak nang panalo matapos ilayo ang koponan sa limang puntos.
Humataw si Cruz dahil halos nasa bench siya sa ikatlong yugto bunga ng fouls.
Ngunit hindi naramdaman ang kanyang pagkawala dahil sa mahusay na pagdadala ni Luib at matapos ang yugto ay nakaangat pa ang Letran ng tatlong puntos, 54-51.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.