PHOTO: Facebook/Dost_pagasa
BAHAGYANG lumakas ang bagyong Marce, ayon sa latest update ng Philippine Atmospheric, Geophysical and Astronomical Services Administration (PAGASA).
Base sa 11 a.m. weather bulletin, ito ay huling namataan sa layong 775 kilometers silangan ng Borongan City, Eastern Samar.
Taglay nito ang lakas na hanging 75 kilometers per hour malapit sa gitna at bugsong aabot sa 90 kilometers per hour.
Kasalukuyan itong kumikilos sa bilis na 35 kilometers per hour pa-kanluran.
Ayon sa PAGASA, ang bagyo ay posibleng tumama sa lupa ng Babuyan Islands o kaya naman sa mainland ng northern Cagayan pagdating ng Huwebes ng gabi, November 7, o kaya sa Biyernes, November 8.
Baka Bet Mo: SB19 may pa-donation drive para sa nasalanta ng bagyong Kristine
Pero paglilinaw ng ahensya, pwede ring magbago ang track nito: “Due to uncertainty in the strength of the high pressure area north of MARCE, the forecast track may still change and bring the landfall point to mainland Cagayan-Isabela area.”
Sinabi rin ng weather bureau na inaasahang lalakas pa sa mga susunod na araw ang bagyong Marce.
“This tropical cyclone is expected to gradually intensify and may reach severe tropical storm category by tomorrow (5 November). Furthermore, it may also reach typhoon category by tomorrow evening or Wednesday early morning. Rapid intensification is likely,” lahad sa website.
Dahil daw diyan ay nakatakda silang magtaas ng Tropical Cyclone Wind Signals simula bukas, November 5.
“Tropical Cyclone Wind Signal No. 1 may be hoisted over portions of Cagayan by tomorrow. The highest Wind Signal which may be hoisted during the occurrence of MARCE is Wind Signal No. 4,” ani ng PAGASA.
Sa ngayon, wala pang direktang epekto ang bagyo sa anumang bahagi ng bansa, pero asahan ang isolated light rains sa Batanes at Babuyan Islands na dulot ng Northeasterly Windflow.
Gayundin ang mararanasan sa Eastern Visayas, Bicol Region, Aurora, Quezon, at nalalabing bahagi ng Cagayan Valley dahil naman sa “trough” o buntot ng bagyo.
Makakaranas din ng mga pag-ulan sa Metro Manila nang dahil naman sa localized thunderstorms.