Toni Muñoz at Antonio ‘Pedring’ Muñoz
NAGING madamdamin ang tagos sa pusong mensahe ng percussionist ng Ben&Ben na si Toni Muñoz para sa yumao niyang aman si Antonio “Pedring” Muñoz.
Namayapa ang kanyang tatay last Tuesday, August 6, at sa pamamagitan ng kanyang Instagram account, pinasalamatan ni Toni si “Paers”, ang tawag niya sa ama.
Kalakip ang mga litrato ni Ginoong Antonio noong nabubuhay pa ito ay ang makabagbag-damdaming mensahe ng Ben&Ben member.
“Salamat sa iyong ngiti, na sabi ng marami nitong mga nakaraang araw, ay ang pinagmulan daw ng sa akin. Siguro sa lahat ng nakuha ko sa iyo ito ang paborito ko.
“Salamat sa mga biro at pagpapatawa. Nitong mga nakaraang araw, kahit hirap na hirap ka na, nakukuha mo pa ring humirit ng mga ganito para pagaanin ang lahat,” ang unang bahagi ng IG post ni Toni.
Patuloy niya, “Salamat sa ilang taon ng sakripisyo at pagtatrabaho sa malayo, para masigurado na okay kami ni Kuya at ni Maers.
“Salamat dahil sa inyo ko nakuha ang hilig ko sa photography, at higit sa lahat, sa karangalan na makuhanan ko kayo ng maraming-maraming litrato tuwing umuuwi ako.
“Salamat sa pagiging halimbawa ng pag-ibig na hindi inuuna ang sarili,” aniya pa.
Baka Bet Mo: Mikael gusto uling makatrabaho sina Bitoy, Paolo at Antonio: Pero sana sa drama para maiba!
Isa pa sa mga natutunan ng musician sa kanyang ama ay, “Nakita kong ang pagmamahal ay p’wede rin palang tahimik.
“Ginto ang ‘yong mga salita, pero sa minsang bibitawan mo ang mga ito, punung-puno ito ng saya, ng kaalaman, ng dunong, ng pagmahahal.
“Salamat sa pagmamahal, sa pagpapatawad sa mga kamalian at pagkukulang. Salamat sa iyong buhay, Pa,” pahayag pa ni Toni.
Nangako rin siya sa kanyang namayapang ama, “Sisikapin kong maging kasing-mapagbigay, mabuti, hindi makasarili, at masayahin kagaya mo.
“Paalam…Pero gaya nga ng huling sinabi mo sa akin, Pa, see you tomorrow. Mahal na mahal ka namin,” aniya pa.
Sa social media rin ipinaalam ni Toni ang pagpanaw ng ama, “With heavy hearts, we share the sad news of the passing of Antonio ‘Pedring’ Muñoz, a beloved husband, father, grandfather, brother, uncle, and friend to many.
“Kami man ay nagdadalamhati sa kanyang paglisan, payapa ang aming mga puso sa pag-alala sa pagmamahal at kasiyahang ibinahagi n’ya sa aming buhay. Salamat sa lahat ng inyong mga panalangin,” ang opisyal na pahayag ng kanilang pamilya.