PHOTO: Screengrab from Instagram/@andieigengirl
HALOS mangiyak-ngiyak ang celebrity mom na si Andi Eigenmann nang tanggapin ang pagkilala para sa yumao niyang ina na si Jaclyn Jose.
Pinarangalan kasi ang legendary actress ng “Honorary Distinction Award” sa naganap na Parangal ng Sining ng Film Development Council of the Philippines (FDCP) noong April 19.
Nakunan ng INQUIRER.net ang emosyonal na talumpati ni Andi sa nasabing awards ceremony at dito niya inihayag ang kanyang pagkatuwa at pasasalamat para natanggap ng ina.
“Para sa aking nanay na si Jaclyn Jose, masaya po akong tumatayo dito para tanggapin ang parangal na ito para sa kanya. Maraming salamat po sa Film Development Council of the Philippines sa pagbigay ng parangal na ito para sa kin nanay na si Jaclyn Jose,” panimula ng dating aktres sa kanyang speech.
Patuloy niya, “Ako po ay pinagpala na lumaki sa mga kamay ng isang napakagaling na aktres na ibinigay ang buong buhay, ang buong puso, buong kaluluwa niya sa paglikha ng mga pelikula at sa pag-arte.”
Baka Bet Mo: Andi naiyak sa natuklasan sa phone ni Jaclyn: ‘She’s been my biggest fan’
Inamin din ni Andi na masakit para sa kanya ang makatanggap nito bilang naaalala niya ang pagpanaw ng ina, pero sigurado daw siya na masayang-masaya si Jaclyn sa ibinigay na award.
“She deserves this award and thank you so much for that recognition,” wika ng anak ng iconic actress.
Ani pa niya, “Masaya ko pong ihehelera ito kanyang mahigit 50 na tropeyo dahil sa kanyang galing sa pag-arte.”
Sa Instagram Stories, proud na ibinandera ni Andi ang kanyang picture habang nasa stage at hawak-hawak ang tropeyo ng kanyang nanay.
Ibinida niya rin ang kanyang formal look para sa gabing iyon at makikitang kasama niyang nagpunta sa event ay ang longtime partner na si Philmar Alipayo.
Ayon kay Andi, ito ang kauna-unahang formal event na dinaluhan nilang magkasama ni Philmar.
“First formal event with @chepoxz. Para kay nanay [red heart emoji],” caption niya sa IG post.
PHOTO: Instagram Stories/@andieigengirl
Kung maaalala, noong March 2 nang sumakabilang-buhay si Jaclyn sa edad na 60.
Una itong kinumpirma ng kanyang talent management na PPL Entertainment noong March 3.
Kinabukasan naman ay opisyal na ipinaalam sa publiko ni Andi na myocardial infarction o heart attack ang sanhi ng pagpanaw ng batikang aktres.
Ilan sa mga nagawang pelikula ni Jaclyn ay ang “Private Show” (1985), “White Slavery” (1985), “Itanong Mo Sa Buwan” (1988), “Machete II” (1994), “Sarong Banggi” (2005), at “Ma’ Rosa” (2016).
Sa telebisyon lumabas siya sa “The Legal Wife” (2014), “Maalaala Mo Kaya,” at “FPJ’s Ang Probinsyano.”