Alden Richards at Kathryn Bernardo (Photos from Twitter)
TRENDING si Alden Richards sa social media nitong nagdaang Easter Sunday, March 31, dahil sa pagsali niya sa isang Sunday Run.
Ginaganap ang nasabing fun run sa Makati City tuwing Linggo pero walang kumpirmasyon kung nitong nagdaang Linggo ng Pagkabuhay tumakbo ang Asia’s Multimedia Star.
Sa mga post na nabasa nami sa X (dating Twitter), tumakbo raw si Alden sa kahabaan ng Ayala Avenue sa Makati at marami ang nagpa-selfie sa kanyang mga kapwa runner at yung iba ay napadaan lamang sa lugar.
In fairness, pinagbibigyan naman daw ng Kapuso superstar ang mga gustong magpa-picture sa kanya. Kaya nga raw medyo natagalan bago nakarating sa finish line ang binata.
Sa isang X post na nabasa namin, five kilometers lang ang tatakbuhin sana ni Alden ngunit naging 12 kilometers daw ito. Umabot umano ng 1 hour and 24 minutes bago niya natapos ang Sunday Run.
Marami naman ang nagkomento na kahit daw pawisan at gulo-gulo ang buhok ng aktor ay ang fresh-fresh at ang yummy pa rin nito. Gwapung-gwapo sila kay Alden.
Comment ng isang netizen, “How can anyone be Hot and Cute at the same time.”
May ilan namang nag-post sa socmed ng picture ni Alden na may kasamang lalaking runner pero tila binigyan ito ng malisya ng mga netizens.
Nito namang nagdaang Holy Week break, naging top trending topic din si Alden at Kathryn Bernardo sa socmed nang muli silang magkasama.
Baka Bet Mo: Kris nagdiwang ng Easter kasama sina Bimby at Mark Leviste, muling nag-enjoy sa pagsa-shopping
Nangyari ito sa 28th yacht birthday party ni Kathryn sa El Nido, Palawan kung saan nakasama rin nila ang iba pang cast members ng pelikulang “Hello, Love, Goodbye.” Naroon sina Lovely Abella, Kakai Bautista at Maymay Entrata.
Sa mga litrato at video na nakita namin sa social media, pinatunayan nina Alden at Kathryn na hanggang ngayon ay okay na okay pa rin ang kanilang relasyon as friends kahit matagal-tagal silang hindi nagkita.
May picture sila together na tila nag-uusap nang masinsinan habang nagkakasayahan ang lahat sa yacht party ni Kath.
Pinagpipiyestahan din ngayon sa socmed ang pagkanta ni Alden ng “Bakit Ngayon Ka Lang” na inihandog niya sa birthday celebrator.
Biro pa ng Kapuso superstar, hindi raw niya madalas ginagawa sa mga party pero para kay Kathryn ay game na game siyang nag-perform kasama ang kaibigan nilang si Kakai.
Hirit ni Alden, “Happy birthday, Kath. ‘Di ko ginagawa ‘to.”