Bong Revilla, Beauty Gonzalez at Herlene Budol
LAUGH trip ang entertainment press pati na ang mga co-stars ni Herlene Budol sa mediacon ng “Walang Matigas na Pulis sa Matinik na Misis.”
Ibinahagi kasi ng Kapuso actress at beauty queen ang naging pakiramdam niya nang malamang makakasali siya sa season 2 ng naturang action-sitcom na pinagbibidahan ni Sen. Bong Revilla.
Kuwento ng dalaga, nalaman niya na mapapabilang siya sa cast ng programa nang um-attend siya sa 57th birthday celebration ni Sen. Bong na ginanap noong September 25, 2023.
“Actually, nu’ng birthday ho ni Senator Bong, nagulat ho ako, invited ako. Akala ko ho, hindi niya ako kilala,” ang simulang chika ni Herlene sa mediacon ng “Walang Matigas na Pulis sa Matinik na Misis” last Friday, January 26.
Patuloy ng komedyana, “Pumunta po ako sa hotel, bawal nga daw ho magsama ng iba. Sabi ko, hala, ang gaganda ng mga sasakyan tapos ako, pagbaba ko, inasar pa nga ako, akala nila Grab tapos ako yung nagda-drive.
“Nagpa-valet naman ako. May budget ako pang-valet (parking). Pero pagpasok ko (sa venue ng party) nagulat ako. Parang ako lang yung bagong mukha para sa kanila.
“Sila, parang matatagal na sa industriya. Nandoon sina Manny Pacquiao. Nagulat ako, talagang nagpa-picture ako sa lahat. Nag-attendance ako sa lahat ng tao na nandoon kaya nagpapasalamat ako.
Baka Bet Mo: Janice ikinumpara sa bangus si Gerald: Kasi matinik, parang ang daming issue
“Kasi sobrang, parang first time ko na nag-attend ng birthday na may ganoong eksena. Grabe, parang concert. Ganoon po yung pakiramdam,” ani Herlene.
Sabi pa niya kay Bong, “Hindi pa pala ako nakapagpapasalamat kaya maraming-maraming salamat.”
“Tapos talagang kinilig ako dahil sinabi niya na ‘magkakatrabaho tayo’ kaya tuwang-tuwa po ako noong mag-first taping po ako (sa season 2 ng Walang Matigas na Pulis sa Matinik na Misis).
“Ganoon din po kay Miss Beauty (Gonzalez, leading lady ni Bong sa show) noong nagkita kami sa GMA Gala. Sobrang kalog niya ho.
“Akala ko mababahuan siya sa hininga ko kasi grabe siyang mag-beso. Alam mo yung beso niya? Parang nilanghap niya lahat ng hininga ko nang gabing yon.
“Siyempre, medyo nakainom na ho ako noon. Sabi ko, ‘Hala baka may masabi siya sa hininga ko!” hirit pang chika ni Herlene na ikinahagalpak ng press people at ng mga co-stars niya.
Hindi raw niya ine-expect na mabibigyan siya ng chance na makatrabaho ang mga artistang pinapanood lang niya noon tulad ni Beauty, “Parang nakakakilig kasi yung mga napapanood niyo talaga dati, parang, wow, kasama ko na ngayon. Nagkakaamuyan na kami ng hininga.
“Siyempre, yung ibang mga artista na nakasama ko sa set, talagang sinuportahan po nila ako,” sey ni Herlene.
Samantala, hindi na nagkaroon ng pagkakataon ang mga miyembro ng showbiz press na maka-one-on-one si Herlene dahil agad itong umalis pagkatapos ng Q&A.
Hindi na tuloy siya nausisa sa ilang kontrobersyang kinasangkutan niya nitong mga nakaraang linggo, kabilang na ang isyu sa kanila ng kanyang leading man sa seryeng “Magandang Dilag” na si Rob Gomez.