Mrs. Face of Tourism Philippines pageant umaasang babalik pa rin si Janina San Miguel makaraang umatras

Janina San Miguel/ARMIN P. ADINA

AGAD na nagtapos ang muling pagbabalik ni dating Binibining Pilipinas World Janina San Miguel-Sahota sa mundo ng pageantry ilang araw pa lang ang nakalilipas makaraang ipakilala siya bilang isa sa mga opisyal na kandidata ng Mrs. Face of Tourism Philippines pageant.

Sa isang social media post gabi ng Marso 7, sinabi ng patimpalak na, “it is with regret that we announce the end of [San Miguel’s] journey to the crown representing Quezon City in the Mrs. Face of Tourism Philippines 2023 pageant.”

Pagpapatuloy pa nito, “She will no longer be part of the competition, and any association or reference to our organization with her name will not be acknowledged by us.”

Nitong Enero lang, gumawa ng ingay ang Mrs. Face of Tourism Philippines pageant nang ipakilala nito si San Miguel bilang isa sa mga aplikanteng nagpatala sa screening sa Laguna.

Noong isang taon pa inilunsad ang patimpalak, at nagkaroon na nga ng mga aplikante bago nagtapos ang 2022.

Ngunit nakilala lang ito ng higit na nakararaming Pilipino mula nang muling magpakita ang beauty queen, 15 taon mula nang masungit ang korona bilang Bb. Pilipinas sa gulang na 17 taon.

Mrs. Face of Tourism Philippines organizer Annie Refrea (kaliwa) at Janina San Miguel/ARMIN P. ADINA

Sumikat ang beauty queen dahil sa pagkalat ng bidyo ng sagot niya sa question-and-answer round ng 2008 Bb. Pilipinas pageant na hanggang ngayon ay pinapanood pa rin. Ngunit sa huli niyang screening, pinahanga ni San Miguel ang madla sa bago niyang kumpiyansa, at sa husay niya sa pagsasalita ng Ingles ngayon. Nanatili pa rin naman ang sigla niya mula noon pa.

Sa isang online interview, sinabi sa Inquirer ng pageant organizer na si Annie Refrea na hindi pa huli ang lahat. “We are working on it with her manager, so I hope there’s a win-win situation that is going to happen…She deserves a second change if she changed her mind. I will not take her out,” aniya.

Nilinaw pa ni Refrea, “Again, we are not closing the door for her. There is still time for her to come back since our workshop and contract signing is yet to happen.”

Sinabi niyang umalis na si San Miguel mula sa kanilang message group, at binati na siya para sa pageant niya. “Who knows, she might change her mind at the end of the week. And I hope she does,” ani Refrea.

May mga nagsabing nagtalo sina San Miguel at ang direktor na si Marky Delos Santos kaya nagpasya siyang lisanin ang patimpalak. Sinisikap ng Inquirer na makuha ang panig ng beauty queen, ngunit hindi pa siya tumutugon sa panahon ng pagkakasulat nito.