Iona Gibbs mula Bataan kinoronahang Mutya ng Pilipinas 2022
Mutya ng Pilipinas Iona Gibbs/ARMIN P. ADINA
TATLONG taon makaraang huling magtanghal ng patimpalak, humirang ng isang bagong reyna ang Mutya ng Pilipinas pageant, at siya ay si Iona Gibbs mula Bataan.
Dinaig niya ang 37 iba pang kalahok upang masungkit ng pinakamataas na premyo sa coronation night ng ika-52 edisyon ng pambansang patimpalak na itinanghal sa FilOil EcoOil Center sa San Juan City noong Dis. 4, at tinanggap ang titulo mula kay Klyza Castro na nagwagi noon pang 2019.
Ilang mga reyna pa ang kinoronahan—sina Mutya ng Pilipinas-Tourism International Jeanette Reyes mula Camarines Sur, Mutya ng Pilipinas-World Top Model Arianna Kyla Padrid mula Northern California, at Mutya ng Pilipinas-Overseas Communities Jesi Mae Cruz mula California.
Tinatanggap ni Mutya ng Pilipinas Iona Gibbs (pangalawa mula kaliwa) ang korona niya mula kay Klyza Castro habang nakamasid sina pageant president Cory Quirino (kaliwa) at chair Fred Yuson./ARMIN P. ADINA
Ginawaran din ng mga espesyal na titulo ang mga runner-up—sina Mutya ng Pilipinas-Luzon Shannon Robinson mula Makati City, Mutya ng Pilipinas-Visayas Megan Campbell mula Lapu-LapuCity, at Mutya ng Pilipinas-Mindanao Marcelyn Bautista mula Tarlac City.
Ibabandera ni Reyes ang Pilipinas sa 2023 Miss Tourism International pageant, habang lalaban naman si Padrid sa 2023 World Top Model contest. Hindi pa tinutukoy kung saan lalahok si Gibbs, ngunit sinabi ng Mutya ng Pilipinas organization na naghahanap sila ng pandaigdigang patimpalak kung saan siya isasali.
Nag-host si Castro kasama ang broadcaster na si Gretchen Fullido at aktor na si Marco Gumabao, habang nagtanghal naman ang P-pop group na Alamat, ang girl group na G22 at si Jon Guelas.
Nagpahinga ang Mutya ng Pilipinas pageant noong 2020 at 2021 dahil sa COVID-19 pandemic.
Kasama ni Mutya ng Pilipinas Iona Gibbs (gitna) ang mgak always niya reynang sina (mula kaliwa) Jesi Mae Cruz, Jeanette Reyes, Arianna Kyla Padrid, Marcelyn Bautista, Shannon Robinson, at Megan Campbell./ARMIN P. ADINA
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.