Pinay queens nagpasalamat sa mga koronang nasungkit sa Singapore

Lumina Golden Goddess Krisanta La Madrid/QUEEN OF HEARTS FOUNDATION FACEBOOK PHOTO

DALAWANG kandidata mula sa Pilipinas na lumahok sa 2022 Mrs. Worldwide pageant ang naghayag ng pasasalamat sa Diyos para sa mga koronang tinanggap nila sa patimpalak na itinanghal sa Singapore Chinese Cultural Centre sa Singapore noong Okt. 30.

Hinirang si Mrs. Philippines Krisanta La Madrid bilang Lumina Golden Goddess, habang itinanghal naman si Mrs. Southeast Asia Sarima Paglas bilang Mrs. Worldwide Special Queen Ambassador. Isa pang Pilipina, si Mrs. Western Pacific Angel Tapia, ang kinilala bilang Mrs. Inspiration. Ipinadala silang tatlo ng Queen of Hearts Foundation na nagtatanghal ng taunang Mrs. Queen of Hearts Philippines pageant.

“Alhamdullilah (thank God), I am very grateful and honored to come home with my new crown and sash” sinabi ni Paglas sa Inquirer sa isang online interview.

Sinabi ni La Madrid na “overwhelmed” pa rin siya sa tinanggap na pagkilala sapagkat “I am really not expecting anything, but God is truly amazing.”

Ibinahagi rin nila ang kanilang mensahe sa kandidatang kumatawan sa “Eurasia” na nakasungkit sa pinakamahalagang korona.

“Congratulations, sister. I had a chance to bond with her and I could feel how sincere and beautiful she is inside out,” ani Paglas. Sinabi naman ni La Madrid, “to our newly-crowned Mrs. Worldwide, Mrs. Eurasia, you are amazing and keep being an advocate of goodness for everyone.”

Nagpahinga ang Mrs. Worldwide pageant nitong 2020 at 2021 dahil sa COVID-19 pandemic. Bago itong edisyon para sa 2022, huling itinanghal ang patimpalak noong 2019, kung saan hinirang ang Pilipinang si Llena Tan bilang second runner-up.

Mrs. Worldwide Special Queen Ambassador Sarima Paglas/QUEEN OF HEARTS FOUNDATION FACEBOOK PHOTO

Hindi sa Mrs. Worldwide pageant ang unang assignment nina La Madrid at Paglas. Nang lumahok sila sa Mrs. Queen of Hearts Philippines pageant noong Oktubre 2020, tinanggap nila ang mga titulong magdadala sa kanila sa Mrs. Asia Pacific contest, isa pang pageant na itinatanghal din ng organizer nitong huli nilang contest.

Hinirang si Paglas bilang Mrs. Philippines Asia Pacific-Cosmopolitan, habang itinanghal naman si La Madrid bilang Mrs. Philippines Asia Pacific-Tourism. Ngunit nagbago ang kanilang tadhana nang magkabalasahan ng titulo noong Enero 2021, at napunta ang mga orihinal nilang korona sa mga kapwa nila kandidatang naunang tumanggap ng mga titulong walang kaakibat na international pageant. Nailagay naman sila sa isa pang patimpalak na may mas malawak na saklaw.

Ibinahagi naman ng dalawang reyna ang saloobin nila hinggil sa pagkakaroon ng mga patimpalak para sa mga ginang at mga ina. “Through Mrs. pageants we are all able to share our advocacies and learn different lives of motherhood that could help one another,” ani Paglas.

Samantala, sinabi naman ni La Madrid na “pageantry allows women to be heard and provide an avenue for their advocacy to be known and reach more people.”

Dinagdag pa niya: “To all Filipinos, especially all the moms out there, motherhood is not an ending but a beginning. Dreams still come true, you just have to work hard for it.”