Anak ni Ai Ai biktima ng hit-and-run sa US; kotse nahulog sa bangin

Sean Nicolo at Ai Ai delas Alas

“MAY himala!” Ito ang nasabi ng Comedy Concert Queen na si Ai Ai delas Alas matapos makaligtas sa aksidente ang isa sa kanyang mga anak kahapon.

Ibinahagi ng Kapuso comedienne sa kanyang social media account na naaksidente ang anak niyang si Sean Nicolo matapos mabiktima ng hit-and-run sa Amerika.

Ipinost ni Ai Ai sa Instagram ang ilang litrato na kuha sa lugar kung saan naganap ang aksidente. Makikita rito ang kotseng gamit ni Nicolo na nawasak at nahulog pa sa bangin.

Abot-langit naman ang pasasalamat ng komedyana dahil sa kabila ng nangyari ay hindi gaanong nasaktan ang kanyang anak at tinawag nga itong isang himala.

“Nahulog sa bangin pero sa milagro ng Diyos walang galos ang anak ko,” ani Ai Ai kasabay ng pagpapasalamat sa mga pulis at iba pang taong agad na rumesponde sa pinangyarihan ng aksidente.

“Grabe, Lord, salamat po sa pagliligtas sa anak ko. Walang hanggang pasasalamat,” sabi pa ni Ai Ai sa caption gamit ang hashtag na #maymilagroangbuhay.

Samantala, ipinost din ng Kapuso actress ang screenshot ng conversation nila ng anak sa chat kung saan binigyan siya ng update tungkol sa resulta ng X-ray nito.

“Bruise lang po sa hips, pero ice lang po katapat,” sabi ni Nicolo sabay sabing okay naman ang X-ray nito.

Sabi ni Ai Ai caption, “Walang galos, pasa lang sa hips. Kotse nahulog sa bangin. I praise and glorify you, Lord God.

“Salamat sa kabutihan mo at sa milagro ito sa buhay namin. Salamat sa pangalawang buhay ng anak ko,” mensahe pa ng veteran actress.

Matagal nang naninirahan si Amerika si Nicolo kasama ang kapatid niyang Sophia. Sila ay mga anak ng komedyana sa dating singer na si Miguel Vera.