P680,000 halaga ng shabu, nakumpiska sa Cebu
Arestado ang dalawang drug suspek sa ikinsang buy-bust operation sa Talisay City, Cebu Sabado ng hapon.
Ayon sa Philippine Drug Enforcement Agency – Central Visayas (PDEA RO7), isinagawa ang operasyon sa bahagi ng Sitio Laray, Barangay San Roque bandang 3:20 ng hapon.
Nagresulta ang operasyon sa pagkakaaresto kina Marjun Bayo Cabaluna alyas “Rex,” 25-anyos; at Joselito Abejo, 41-anyos.
Nakumpiska sa operasyon ang isang plastic pack na selyado ng masking tape na naglalaman ng hinihinalang shabu.
Tinatayang nagkakahalaga ng P680,000 ang ilegal na droga.
Maliban dito, nakuha rin ng mga otoridad ang ginamit na buy bust money, cell phones at iba pang non drug evidence.
Kasong paglabag sa Section 5 at 26b, Article 2 ng Republic Act 9165 ang isasampa sa dalawang suspek.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.