Promise ni Jericho: Bukas muling titingala…tuloy ang buhay, hanggang sa muli

HINDI na rin napigilan ni Jericho Rosales ang sarili na maglabas muli ng saloobin sa tuluyang pagpapasara sa ABS-CBN.

Tulad ng malalaking bituin ng Kapamilya Network, tila nagluluksa rin si Echo sa kinalabasan ng resulta ng ABS-CBN franchise hearing sa Congress.

Sa Instagram, nag-post ng malalim na hugot ang award-winning actor kalakip ang kanyang black and white photo.

“Ramdam ang pagyuko ng bawat isang umasa. Ramdam ang bigat sa katahimikang hindi na kailangan ipaliwanag.

“Nagkakaintindihan sa magkasingtunog na buntong hininga. Masakit man ang pagkatalo ngayon, ito ang mas magpapatamis sa tagumpay na nagaantay.

“Bukas muling titingala. Hindi bawal ang tumingala. Ngayong gabi tingnan ang mga tala. Bukas ramdamin ang araw. Walang harang ang himpapawid. Kakabig lang muna ng kaunti,” madamdaming caption ni Echo sa kanyang IG post.

Sa huli, siniguro ni Jericho na hindi dito matatapos ang paghahatid nila ng pagmamahal at ligaya sa madlang pipol.

“Tuloy ang buhay. Tuloy ang pagmamahal. Tuloy ang biyahe. Hanggang sa muli, kap. #kapamilyakahitsaankahitkailan,” pahayag ng aktor.

Nauna rito, ipinadama na ni Echo sa publiko ang matinding kalungkutan matapos ilabas ng National Telecommunications Commission ang cease and desist order para sa pagpapatigil sa operasyon ng kanilang network

“Isa sa pinakamasakit na pagtatapos at katahimikang narinig ko. Bata pa ako pinapanood ko na yang signing off part na may boses ni Mr. Peter Musngi pagkatapos manood kasama ang lolo at lola ko.

“Naging pampatulog na rin at pampakalma. Hindi ko inakala na aabot sa ganitong pagsign-off,” ani Echo.