Netizens nalito sa family photo nina Solenn; life story ni DJ Loonyo babandera sa #MPK

GOOD vibes ang hatid ng pinakabagong family picture na ibinahagi ni Solenn Heussaff sa kanyang Instagram followers.

Makikita sa litrato si Solenn na nakaupo sa kandungan ng asawang si Nico Bolzico habang karga-karga ang kanilang baby girl na si Thylane.

Dahil nakasuot ng pulang shirt si Nico habang pulang shorts naman si Solenn, nakakalito sa unang tingin na tila’y naging hita ni Nico ang legs ng asawa.

Bumuhos naman ang mga nakakaaliw na comments mula sa netizens na hindi maitanggi ang pagkalito sa family picture ng Kapuso actress.

“This is one of those photos that you have to do a double look. Naguluhan ako kung nasaan ‘yung katawan ni Solenn,” sey ng isang netizen.

Sa naman ng isa pang follower ni Solenn, “Nalito ako ng bonggang bongga. Parang abstract, feeling ko nagso solve ako ng puzzle. Hahaha!”

Samantala, may patikim naman si Solenn sa kanyang naging guesting sa ‘new normal’ taping ng morning talk show na Mars Pa More kasama ang hosts na sina Iya Villania at Camille Prats.

Makikita sa Instagram story ni Solenn kung paano siya nag-tape para rito.

Nakaka-excite naman ang magaganap na chikahan at kwentuhan mula sa tatlong Kapuso mommies sa special episode na ito ng “Mars Pa More” para sa kanilang 1st anniversary sa darating na July 27, 8:50 a.m. sa GMA.

* * *

Fresh episode na ang mapapanood ngayong Sabado (July 18) sa #MPK!

Sa pinakabagong episode nito, tampok ang life story ng viral dancer at choreographer na si DJ Loonyo. Nag-train si DJ Loonyo sa iba’t ibang sikat na dance champions sa Pilipinas.

Binuo rin niya ang sariling grupo na Rock*Well, at sumikat siya online dahil sa mga tutorial na ipinu-post nila sa Facebook, Instagram, at TikTok. Pero sino nga ba si DJ Loonyo sa likod ng mga nakakaaliw niyang sayaw?

‘Wag palalampasin ang kuwento ng buhay ng viral dancer, DJ, at choreographer na si DJ Loonyo ngayong Sabado, sa brand new episode ng #MPK.