Babajie pumanaw na dahil sa pneumonia; may bilin sa ina

PUMANAW na ang komedyanteng si Babajie kahapon dahil sa pneumonia. Siya ay 35 years old.

Binawian ng buhay si Babajie, o Alfredo Cornejo Jr. sa totoong buhay, matapos ma-confine nang ilang araw sa San Lazaro Hospital sa Maynila.

Naulila ng komedyante ang inang si Minda Corneno at mga kapatid na sina Almin, Alina at Aljohn.

Balitang ibuburol ang kanyang labi sa bahay nila sa Malibay, Pasay City at ililibing sa Sgt. Mariano Cemetery sa Pasay. Ang tatay naman ng comedian ay isang taon nang patay.

Kinumpirma ng isang kapamilya ni Babajie ang malungkot na balita sa pamamagitan ng Facebook. Narito ang mensahe ng pinsan niyang si Cid Cornejo.

“Un na pala un tinototoo mo ung mga msg mo sa akin…Bakit? Maaga pa. Bata ka ka pa.

“Alam mo kuya na mahal na mahal kita. Ikaw ang pinakaclose ko noon pa man ikaw nag turo sa akin mag business. Ikaw madalas kong kasama…

“Mamimiss kita. I’m so proud of U lagi kita ipinag mamalaki. Lagi mong kakampi. Masakit kuya. Ndi ko kayang sabihin.

“Queen Babajie Cornejo forever in our hearts. Kuya…May you rest now.”

Samantala, may balita rin na isa sa mga ibinilin ni Babajie sa kanyang nanay ay damitan siya ng pambabae sa kanyang burol at punuin ng bulaklak ang dalawang banga.