Sylvia Sanchez, 100+ celeb saludo sa frontliners: Kita-kita tayo sa finish line! 

MAHIGIT 100 Pinoy celebrities ang nagbigay-pugay at nagpasalamat sa lahat ng magigiting na frontliners na patuloy na nagbubuwis ng buhay sa paglaban sa COVID-19 crisis.

Isang video ng pagsaludo at papuri ang ipinost sa Facebook ngayong araw mula Philippine Artists Management, Inc. (PAMI), ang asosasyon ng mga talent managers sa entertainment industry.

Isa nga sa mga nagpaabot ng taos-puso niyang pasasalamat sa medical workers ay ang award-winning actress na si Sylvia Sanchez na nakikipaglaban din ngayon sa coronavirus disease. 

Sa nasabing video, sinabi ni Sylvia na ang mga frontliner ang nagbibigay ng lakas ng loob sa kanya para patuloy na lumaban. Kahanga-hanga raw ang dedikasyon at sakripisyo ng mga ito kahit na may posibilidad na mahawa sila.

Makikita ang Kapamilya actress na nakaupo sa hospital bed at naka-hospital gown habang may nakakabit pang suwero sa kanyang braso.

“Maraming-maraming-maraming-maraming salamat sa inyong lahat, mga frontliners…kita-kita po tayo sa finish line,” sabi ni Ibyang.

Habang sinusulat ang balitang ito ay hinihintay na lang ni Sylvia at ng kanyang asawang si Art Atayde ang pangalawa nilang confirmatory COVID-19 test at inaasahan nga na negative na ang resulta nito matapos ang ilang araw na gamutan sa ospital.

Samantala, bukod sa mga artista tulad ni Sylvia, nagbigay-pugay din sa mga bayaning frontliners ang mga OPM artists, kilalang chefs, beauty queen at mga sikat na DJ. Kasama rin sa video ang Pambansang Kamao na si Sen. Manny Pacquiao.

Narito ang ilan sa mga celebrities na nagbigay ng panahon para saluduhan ang mga magigiting na medical workers at iba pang bayaning frontliners (in order of their appearance): Ogie Alcasid, Derek Ramsay, Vhong Navarro, Alice Dixson, Christian Bautista, Tom Rodriguez, Luis Manzano, JC de Vera, Cherie Gil at Janice de Belen.

Nandiyan din sina Joel Torre, Morissette, Gabby Concepcion, Jestoni Alarcon, Isay Alvarez, Abdul Rahman, Angelu de Leon, Sancho delas Alas, Bobby Andrews.

Bumati rin sina Sunshine Cruz, Gary Estrada, Bernadette Allyson, Enzo Pineda, David Licauco, Edgar Allan Guzman, Shaira Diaz, Aiko Melendez, Cynthia Tomalla, Isabelle de Leon, Katarina Rodriguez, Michelle Marquez Dee, Teejay Marquez, Pinky Amador, RJ Ledesma, Devon Seron, Jerico Ejercito, Martin del Rosario, Luis Hontiveros at Chanel Morales.

Nagbigay din ng mensahe sina Sophia Senoron, JB Saliba, Alyssa Muhlach, Carl Guevarra, Rachelle Alejandro, Ara Arida, Almira Muhlach, Raymond Bagatsing, Monsour del Rosario, Alvin Anson, Kelly Day, Jao Mapa, Cai Cortez, Polo Ravales, James Blanco, Yul Servo, Jessy Mendiola, Kiko Estrada, Samantha Lopez at Korina Sanchez.

Nasa video rin sina Edu Manzano, Rafael Rosell, Dina Bonnevie, Rez Cortez, Sen. Manny Pacquiao, Scarlet Snow Belo, Carla Abellana, Paulo Avelino, Lovi Poe, Dennis Trillo, Janine Gutierrez at Jhong Hilario.