Vilma Santos nagluluksa sa pagpanaw ni Nora Aunor: Rest in peace, Mare…

NAGLULUKSA ngayon ang buong entertainment industry sa biglaang pagpanaw ng nag-iisang Superstar na si Nora Aunor.

Isa sa mga siguradong basag ang puso ngayon ay ang kanyang kaibigan at kumareng si Star for All Seasons Vilma Santos.

Sa kanyang Instagram Story, nag-post ng kanyang pakikiramay ang veteran at award-winning ding aktres para sa namayapang National Artist for Film and Broadcast.

“Our sincerest condolences and prayers. Rest in peace Mare. Ms. Nora Aunor! Our Superstar and National Artist…Maraming salamat,” ang mensahe ni Ate Vi para kay Ate Guy.

Ilang beses ding nagkasama noon sa ilang proyekto ang dalawang showbiz icon kabilang na riyan ang classic film na “T-Bird at Ako” noong 1982.

Nauna rito, nagkasama na rin sila sa 1978 film na “Ikaw Ay Akin”, kung saan ang leading man nila ay si Christopher de Leon.

Sa isang panayam, nabanggit noon nina
Nora at Vilma na game na game silang makagawa uli ng pelikula na magkasama.

“Iyan ang pag-uusapan namin. Siguro naman, kung may magandang proyekto na parang T-Bird at Ako, na naaayon o tumutugma sa aming dalawa ay bakit hindi? Para sa akin ay walang problema,” sey ni Ate Guy.

Sabi naman ni Vilma, “Sana mabigyan kami ng magandang script. Kasi, sa klase ng tayo namin ngayon, we’re not getting any younger.

“Kailangan namin ng isang magandang script para nang sa ganun ay makaasa kami na papanoorin ng mga tao,” aniya.

Kagabi, kinumpirma ng anak nina Ate Guy at Christopher na si Ian de Leon ang pagpanaw ng Superstar sa pamamagitan ng Facebook.

“With deep sorrow and heavy hearts, we share the passing of our beloved mother, Nora C. Villamayor ‘Nora Aunor’ who left us on today April 16, 2025 at the age of 71.

“She was the heart of our family — a source of unconditional love, strength, and warmth. Her kindness, wisdom, and beautiful spirit touched everyone who knew her. She will be missed beyond words and remembered forever,” saad ng aktor.