NATAGPUANG patay ang principal ng isang pampublikong eskuwelahan matapos mag-check in sa isang motel sa Ilagan City, Isabela, Huwebes ng hapon.
Nakilala ang nasawi bilang si Edford Rico, residente ng Brgy. Lingaling, Tumauini, ayon sa ulat ng Isabela provincial police.
Si Rico ay punung guro ng Lalauanan National High School, ayon sa Tumauini PNP.
Natagpuang walang buhay si Rico sa Sky Park Hotel sa Brgy. Alibagu, Ilagan, dakong ala-1.
Bago iyon, dakong alas-11:43 ng umaga, dumating si Rico sa hotel sakay ng kanyang Mitsubishi Adventure (WHE-879) at nag-check in kasama ang isang di kilalang babae, ayon sa ulat.
Makaraan lang ang isang oras ay tumawag sa hotel desk ang babae para humingi ng saklolo, dahil bigla na lang umanong nabuwal si Rico.
Doon na natagpuan ng mga hotel staff si Rico na walang malay sa kama, kaya tumawag ng ambulansya.
Hindi naman na nakilala ang kasama niyang babae, dahil agad itong umalis sa motel.
Dinala pa ng lokal na rescue team si Rico sa Gov. Faustino N. Dy Sr. Memorial Hospital, pero idineklara siyang patay ng doktor, ayon sa provincial police.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.