Brgy. chair nagbenta ng baril, nakipagbarilan, patay

(Photos courtesy of Surigao City PNP)

PATAY ang isang barangay chairman nang makipagbarilan sa mga alagad ng batas na nakahuli sa kanyang nagbebenta ng baril sa likod ng police station sa Surigao City, Huwebes ng hapon.

Nakilala ang napatay bilang si Reneboy Aquino, 41, residente’t chairman ng Brgy. Balibayon, sabi ni Lt. Col. Christian Rafols, hepe ng Surigao City Police.

(Photos courtesy of Surigao City PNP)

Bago ito, nagsagawa ang intelligence operatives ng buy-bust operation laban sa isang taong iligal na nagbebenta ng baril, sa Amat st., Purok Million, Brgy. Taft, dakong ala-1.

Inayos ang transaksyon sa pamamagitan lang ng text at di pa noon alam ng mga operatiba na si Aquino ang nagbebenta, sabi ni Rafols sa isang pulong-balitaan na inere sa social media.

Dadakpin na sana si Aquino nang tanggapin niya ang buy-bust money, pero napansin niya ang mga palapit na pulis kaya sinubukang paputukan ang mga ito, ani Rafols.

(Photos courtesy of Surigao City PNP)

Di pumutok ang baril kaya muli itong ikinasa at itinutok ni Aquino, dahilan para paputukan ng mga operatiba, aniya.

Nasamsam kay Aquino ang isang kalibre-.45 pistola na may bala pa sa chamber, magazine na may apat pang bala, isang granada, at ang P1,000 papel at pekeng P9,000 cash na ginamit sa buy-bust.

Kinumpiska rin sa kanya ang dalawang cellphone, motorsiklo, at wallet na may mga identification card.

(Photos courtesy of Surigao City PNP)