Bea, Juday, Maja bibigyang-pugay sa Film Ambassadors’ Night ng FDCP
BEA ALONZO
Bibigyang-pugay ang tatlong Kapamilya stars sa 4th Film Ambassadors’ Night (FAN) ng Film Development Council of the Philippines (FDCP).
Ngayong Linggo, Feb. 9, gaganapin ang nasabing event sa Maybank Performing Arts Theater, BGC sa Taguig City. Dito pararangalan sina Judy Ann Santos, Bea Alonzo at Maja Salvador na nagpakitang-gilas sa aktingan at kinilala hindi lang dito sa Pilipinas kundi maging sa ibang bansa.
Sa pangunguna ni FDCP Chairperson and CEO Liza Diño-Seguerra, taun-taon kinikilala sa FAN ang mga Pinoy film industry artists, filmmakers, at mga taga-TV na nanalo sa iba’t ibang international festival.
Kabilang na nga riyan sina Juday na nanalong best actress sa 41st Cairo International Film Festival (Egypt) para sa “Mindanao”; si Bea na napasama sa Asian Stars Up Next Award sa 4th International Film Festival & Awards-Macao (China); at Maja Salvador na nagwaging best actress sa Asian Content Awards (Busan, South Korea) para sa Kapamilya series na Wildflower.
Bukod dito, kikilalanin din ang mga yumaong aktor na sina Eddie Garcia, Tony Mabesa, at Kristofer King bilang mga honorees sa FAN 2020. Nagwaging Best Actor sina Eddie at Tony sa 52nd Worldfest Houston International Film Festival (Houston, Texas, USA) para sa pelikulang “Rainbow’s Sunset” habang Best Male Actor naman si Kristofer sa ASEAN International Film Festival and Awards 2019 (Kuching, Sarawak, Malaysia) para sa “Kristo”.
Nandiyan din sina Eddie Garcia, Tony Mabesa, Gloria Romero, Aiko Melendez, Tirso Cruz III, Shido Roxas, Albie Casiño at Ross Pesigan na nanalong Best Ensemble Acting sa International Film Festival Manhattan 2019 (Manhattan, New York, USA) para pa rin sa “Rainbow’s Sunset.”
Honorees din sa FAN 2020 sina Ogie Alcasid, Ina Raymundo, Ai-Ai delas Alas, Maxine Eigenmann, Dante Rivero, Barbara Miguel, Soliman Cruz, Angeli Bayani, Cesar Montano, Direk Joel Lamangan, Direk Jun Robles Lana, Atty. Joji Alonso, Direk Louie Ignacio, Direk Raymund Ribay Gutierrez at marami pang iba.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.