True ba, top-grosser na sa 2019 MMFF ang ‘Miracle’ ni Aga?

TOTOO nga kaya ang lumabas na balita sa social media na nalagpasan na ng “Miracle In Cell No. 7” ang kita ng “The Mall, The Merrier” makalipas ang apat na araw ng ginaganap na 2019 Metro Manila Film Festival.

Bagamat wala pang inilalabas na official ranking ang organizers ng taunang filmfest sa walong naglalabang entries, may mga kumakalat ng unofficial result sa iba’t ibang social media platforms.

Sa ilang sinehan sa Metro Manila, balitang nangunguna pa rin sa takilya ang “The Mall, The Merrier” nina Vice Ganda at Anne Curtis at nasa second spot ang “Miracle in Cell No. 7” ni Aga Muhlach.

Ikatlo naman ang “3Pol Trobol, Huli Ka Balbon” ni Coco Martin na sinundan ng “Mission Unstapabol: The Don Identity” ni Vic Sotto.

Pero may ulat naman na sinasabing galing mismo sa ilang cinema insiders na nasa number one spot na ang pelikula ni Aga at nalaglag sa ikalawang pwesto ang entry ni Vice base sa nationwide gross ng lahat ng walong kalahok.

Kung totoo nga ang nasabing resulta, ito ang unang pagkakataon sa loob ng pitong taon na magiging second lang sa labanan si Vice at kung reliable nga ang source ng nasabing report, si Aga lang ang nakaputol sa pagiging Unkabogable ng TV host-comedian sa MMFF.

But of course, wala pa ngang official statement ang MMFF organizers hinggil sa ranking ng walong entries at yun ang hintayin natin pero kayo pa rin ang magdedesisyon kung paniniwalaan n’yo ito o hindi.