ARESTADO ang apat na Chinese national para sa umano’y pagpatay sa isang babae nilang kababayan, sa loob ng isang condominium unit sa Makati City.
Iniimbestigahan na ang mga suspek na sina Zhang Chuning, 22, babae; Zhang Cha Quan, Wang Xue, at Zhang Yi Xi, pawang mga lalaki, ayon sa ulat ng Southern Police District.
Bago ito’y natagpuan ang pinagtilad-tilad na bangkay ng biktimang si Wang Yalei, 26, sa The Lerato Residence tower 1, Malugay st., Brgy. Bel-air, dakong alas-5:45 ng hapon Huwebes.
Kasamang nakatira ni Wang ang isa mga suspek sa isang unit sa ika-11 palapag ng condominium.
Bago natagpuan ang bangkay, ipinaalam ng mga taga-housekeeping sa security guard na may nakuha silang plastic bag sa material recovery facility na may mga duguang damit, tissue paper at kutsilyo.
Dahil dito’y sinilip ng security personnel ang CCTV footage, at nakita ang mga suspek na bitbit ang plastic bag palabas ng room 1116.
Doon na sinadya ng security personnel ang silid, at natagpuan ang apat na Chinese sa loob.
Natagpuan din nila sa banyo ang isang duguang luggage, kung saan inilagay ang mga parte ng katawan ng biktima, kaya humingi na ng saklolo sa pulisya, ayon sa ulat.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.