‘signal Rock’ nina Chito Roño at Christian Bables nominado sa Best Foreign Film ng 2019 Oscars
CHRISTIAN BABLES
NASA alapaap ang pakiramdam ngayon ni Christian Bables o mas kilala ngayon bilang si Intoy sa pelikulang “Signal Rock” dahil opisyal na itong nominado sa 2019 Academy Awards o Oscars sa kategoryang Best Foreign Language Film.
Parating nagpapadala ang Pilipinas ng entry sa Academy of Motion Picture Arts and Sciences o Oscars pero ni minsan ay hindi pa tayo napasama sa mga nominado na sinimulan noong 1953 ng pelikulang “Genghis Khan” na idinirek ni Manuel Conder (RIP).
At makalipas nga ang 65 taon sinuwerte nang mapasama ang Pilipinas sa 86 countries na magtutunggali sa 2019 Best Foreign Language Film sa Oscars. Ang “Birdshot” (2017) ni Mikhail Red ang huling isinali ng bansa pero hindi pa rin pinalad na mapasama sa mga nominado.
Ang “Signal Rock” ang napili ng Film Academy of the Philippines (FAP) na isali sa Oscars at tanda naming nabanggit ni direk Chito Roño na na-stress siyang bigla kasi nga baka hindi mapili ulit tulad ng unang pelikula niyang “Dekada 90” na isinali noong 2003.
Pero mukhang mas lalong stress ngayon si direk Chito dahil nasungkit niya ang unang nominasyon pagkalipas nang mahigit anim na dekada sa movie industry.
Ang taray ni direk dahil kinabog niya sina Brillante Mendoza (Ma ’Rosa), Mikhail Red (Birdshot), Lav Diaz (Norte, Hangganan ng Kasaysayan), Adolf Alix Jr. (Donsol), Gil Portes (Gatas sa Dibdib ng Kaaway/Mga Munting Tinig/Saranggola), Eddie Romero (Ganito Kami Noon, Paano Kayo Ngayon), Marilou Diaz-Abaya (Karnal/Pusod Ng Dagat/Milagros), Lino Brocka (Bayan Ko, Kapit sa Patalim), Jerold Tarrog (Heneral Luna) na nagsumite rin sa Oscars pero hindi pinalad.
Panay-panay naman ang hingi ni Christian ng suporta sa publiko na sana’y suportahan ang “Signal Rock.”
Post ni Christian sa kanyang social media account, “Signal Rock is happy to be Philippines’ representative to Oscars 2019. Pilipinas, we need your help and support. Please help us make noise at lumaban sa 86 pang mga bansa. In God’s will, this might be our Country’s first Oscars nomination. #SignalRockForOscars2019.”
Speaking of Christian, bagama’t supporting role siya sa seryeng Halik ay siya naman ang parating kasama ng bidang si Jericho Rosales bilang si Barry.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.