Tone-toneladang nabubulok na kamatis itinapon sa landfill sa Laguna

DAHIL sa sobra-sobrang suplay ng kamatis, napilitan ang mga lokal na magsasaka na itapom ang tone-toneladang kamatis na nagsimulang mabulok sa bayan ng Kalayaan, Laguna. 

Gumawa na ang provincial agriculture office ng mga hakbang para maiwasan ang pangyayari. 

“They can’t be (sold anymore) as they have already started to rot. We’ll have to dispose of them in a sanitary landfill or as animal feed,” sabi ni Laguna agriculturist Marlon Tobias. 

Idinagdag ni Tobias na humingi ng tulong ang komunidad ng 40 nagtatanim ng kamatis mula sa Barangay San Antonio matapos tumanggi ang mga mangangalakal mula sa Maynila na bilhin ang kanilang aning kamatis noong isang linggo.

“The supply doesn’t just come from Laguna. Some from Mindoro, Pangasinan, even Mindanao,” ayon pa kay Tobias. 

“We’ve been telling them (growers): ‘don’t plant the same vegetable all at the same time (to avoid an oversupply),’” paliwanag pa ni Tobias.

Sa nakaraang ani, inaalok ng mga namimili ang mga magsasaka na bilhin ang isang kahon (21 kilo) ng kamatis sa halagang P500.  Bunsod ng sobra-sobrang suplay, napilitan ang mga magsasaka na ibaba ito sa P100 kada kahon hanggang tumanggi na ang mga ito na bilhin ang mga sobra.

Gumagastos ng P200,000 kada ektarya sa pagtatanim ng kamatis. 

Tinatayang 40 hanggang 50 ektarya ng lupa ang tinataniman ng kamatis sa bayan. Inquirer