Yassi dinenay na nililigawan ni Coco; umaming fan ni Maine

MARIING pinabulaanan ni Yassi Pressman na nililigawan siya ni Coco Martin at meron na raw silang mutual understanding.

Ang paniwala kasi ng fans, lalo na ng avid viewers ng seryeng Ang Probinsyano ay may namamagitan na talaga sa kanila sa totoong buhay. Parang totohanan na raw kasi ang pagmamahalan nila bilang sina Cardo at Alyana sa Probinsyano.

Pero kahapon sa grand mediacon ng bagong pelikula ni Yassi under Viva Films, ang “Para Sa Broken Hearted,” dinenay ng dalaga na may something super special na sa pagitan nila ni Coco.

“Yung pagiging maalaga at maasikaso niya hindi lang naman sa akin, sa lahat ganu’n siya kaya mahal na mahal siya ng buong production, ng lahat ng cast. Palagi siyang nakaalalay sa aming lahat,” paliwanag ni Yassi. Aniya pa, pamilya ang turingan nila sa Probinsyano kaya halos lahat sila ay close na close na.

Tungkol naman sa isyu kung bakit hindi siya ang kinuhang leading lady ni Coco sa 2018 MMFF entry nitong “Jak Em Popoy”, wala naman daw itong isyu sa kanya. At naniniwala siya na perfect si Maine Mendoza sa role nito sa movie.

Inamin ni Yassi na fan din siya ng AlDub at matagal na rin niyang kaibigan si Alden. Aniya, suportado ng buong Probinsyano family ang festival movie nina Coco, Maine at Vic Sotto.

Sa katunayan, ngayon pa lang ay ipino-promote na ni Yassi ang nasabing MMFF entry sa kanyang social media accounts kaya naman love na rin siya ng mga fans ni Maine.

Samantala, ang pelikulang “Para Sa Broken Hearted” ay ibinase sa best-selling novel (na may kapareho ring titulo) ni Marcelo Santos III. At mula nga ng ilabas ang trailer nito ay pinag-usapan na nang husto sa social
media.

Makakasama ni Yassi rito sina Shy Carlos, Louise delos Reyes, Marco Gumabao at Sam Concepcion, sa direksyon ni Digo Ricio. Sey ni Yassi, the movie is more than a hugot film at siguradong makaka-relate ang marami sa mga karakter nila sa pelikula.

Showing na sa mga sinehan ang “Para Sa Broken Hearted” sa Oct. 3 nationwide under Viva Entertainment.