PH Search For Stars grand finalists pwedeng isabak sa TNT, Little Big Shots, The Voice Kids

NAPAKARAMI talagang mga kabataan at talentadong Pinoy na pwedeng-pwedeng sumikat at magkaroon ng sariling pangalan sa mundo ng entertainment.

Kamakailan ay nasaksihan namin ang pagpapakitang-gilas ng mga bagets mula sa iba’t ibang bahagi ng Metro Manila sa ginanap na “Philippines Search For Stars” sa Tanghalang Pasigueño sa Pasig City.

Ito’y isang talent search handog ng Star Entertainment Production & Talent Management (STEP) na layuning maka-discover ng mga talentadong kabataan.

In fairness, nag-enjoy kami sa panonood sa mga bagets na nagpakita ng kanilang talent sa pagkanta at pagsayaw. At sa galing nga mga bata, puwede silang ipanglaban sa Tawag ng Tanghalan ng It’s Showtime o The Voice at Little Big Shots ng ABS-CBN.

May kanya-kanyang team ang mga bagets, Team Jomari at Team Mimosa na siyang mga naging mentor ng mga contestant.

Itinanghal na big winner si Karol Josef Martinez, 12, matapos talunin ang nakasama niya sa Top 5 na sina Adea Naidine Solon, 13; Andrea Gicel Aguilar, 9; Joven Pascual at Joana Marie Abraham.

Sa unang pagpili ng Top 5 nanguna si Joven na nakakuha ng 96.25 percent at sinundan siya ni Karol Josel na mayroong 93.25 %, at pumangatlo si Andrea na nakakuha ng 77%.

At sa muling pagtutunggali ng lima, si Karol Josef na ang nakakuha ng unang puwesto.

Ang STEP ay pinamamahalaan nina Roselyn Jorta (president at CEO), Bianca Foster (executive producer), Lester Dimaranan (creative director), at Cielo Dizon (PR at talent manager).

Ayon sa STEP, naiiba sila sa mga kilala ng production and talent management dahil, “We have the most comprehensive workshops for talents of all levels, from new faces to professionals.

We utilize cutting edge technology to bridge and unite aspiring and professional talents with top TV networks and advertising agencies.”