‘Sa wakas, makalipas ang maraming taon nauntog din sa katotohanan si Claudine!’

NANINIWALA na kaming nagseseryoso na si Claudine Barretto sa pagbabalik sa mundong mahal niya at nagbigay sa kanya ng magandang kapalaran. Madalas siyang makita-makasama ngayon ng mga anak ng aming mga kaibigan sa gym.

Chika pa ng aming kaibigan, “Ilang beses na palang nagbabayad sa gym na ‘yun si Claudine, pero nasasayang lang, dahil hindi naman siya nagpupunta. Minsan-makalawa lang siyang nagpapakita du’n, pagkatapos, e, wala na!

“Sayang naman ang ipinambabayad niya, mahal ang fee sa gym na ‘yun dahil very exclusive. Pero this time, e, regular na talaga siyang nagdyi-gym, kita n’yo naman ang resulta ng pagsasakripisyo niya, di ba?

“Ang laki-laki ng naibagsak niyang timbang, saka maganda ang pagpayat niya, hindi pilit. Nakuha niya ‘yun sa pagtitiyaga,” kuwento ng aming kausap.

Maraming salamat naman at pagkatapos nang ilang taon ay nauntog na rin sa katotohanan si Claudine Barretto na sayang na sayang ang mga panahong dumadaan sa kanyang buhay nang walang nangyayari sa kanyang career.

Pinagreynahan niya nu’n ang mga teleserye ng ABS-CBN, sikat na sikat siya, kaya nakapanghihinayang kung palalampasin lang niya ang magagandang oportunidad na puwede pa naman niyang hawakan uli.

Sana nga ay tuluy-tuloy na ang pagbabalik-pelikula at telebisyon ni Claudine Barretto. Marami pa ring naghihintay sa kanya.